Հարավային Կովկասում կայուն խաղաղության հեռանկարն ավելի իրատեսական է թվում, քան նախկինում․ Չավուշօղլու

«Խաղաղությունը պետք է գա անհետ կորածների ընտանիքների կյանք և սրտեր»։ Այս մասին հայտարարել է Թուրքիայի խորհրդարանի պատգամավոր, Թուրքիայի նախկին արտգործնախարար Մևլութ Չավուշօղլուն՝ Անհետ կորած անձանց հարցերով Բաքվի երկխոսության շրջանակում անցկացվող IV միջազգային համաժողովի ժամանակ, հաղորդում են ադրբեջանական լրատվամիջոցները։

Նա նշել է, որ խաղաղության բանակցություններն ու համաձայնագրերը կարող են վերջ դնել ռազմական գործողություններին, սակայն կայուն խաղաղության համար անհրաժեշտ է հաշտեցում։

«Հարավային Կովկասը բախվել է հակամարտության, հարկադիր տեղահանության և խորը հումանիտար տառապանքների։ 1980-ականների վերջից, հատկապես՝ 1990-ականների սկզբից, Ադրբեջանը բախվել է արտաքսման, հարկադիր տեղահանության և անհետ կորած անձանց ողբերգությանը։ 1990-ականների սկզբից անհետ կորած շուրջ 4 հազար Ադրբեջանի քաղաքացիների ճակատագիրը մինչ օրս շարունակում է մնալ լուրջ հումանիտար խնդիր։ Այսօր նախագահ Իլհամ Ալիևի ղեկավարության շնորհիվ Հարավային Կովկասում կայուն խաղաղության հեռանկարն ավելի իրատեսական է թվում, քան նախկինում»,- ասել է նա։

Ըստ նրա՝ Ադրբեջանի և Հայաստանի միջև ձեռք բերված նախնական խաղաղության համաձայնագրում անհետ կորած անձանց վերաբերյալ դրույթի ներառումը կարևոր ցուցանիշ է։ Դա վկայում է այն մասին, որ այս հարցը ճանաչվել է որպես ավելի լայն խաղաղության գործընթացի բաղկացուցիչ մաս։

«Այս չսպիացած վերքի ճանաչումը որպես խաղաղության հաստատման և հաշտեցման գործընթացի անբաժանելի մաս, անկասկած, կբարձրացնի մարդկանց միջև փոխադարձ վստահությունը և կստեղծի կայուն խաղաղության ամուր սոցիալական հիմք»,- հայտարարել է Չավուշօղլուն։

Թարգմանությունը՝ Էմմա Չոբանյանի