Բաքուն արձագանքել է Գերմանիայի հետախուզության նախկին ղեկավարի՝ Ադրբեջանի հետ կապ ունենալու մասին լուրերին

«Գերմանիայի Դաշնային հետախուզական ծառայության (BND) նախկին ղեկավար Ավգուստ Հաննինգի նկատմամբ իրականացվող հետաքննության շրջանակում մի շարք արտասահմանյան լրատվամիջոցների կողմից տարածվող տեղեկությունը, որում հիշատակվում է Ադրբեջանը, ապատեղեկատվական բնույթ ունի և դիտարկվում է որպես վերջին շրջանում Ադրբեջանի դեմ ակտիվորեն իրականացվող վարկաբեկման արշավի բաղկացուցիչ մաս»։ Այս մասին ասվում է Ադրբեջանի Մեդիայի և հեռարձակման խորհրդի հայտարարության մեջ։

Նշվում է, թե, իբր, Ադրբեջանը հիշյալ հետաքննության հետ կապող անհիմն պնդումները, որոնք ի սկզբանե տարածվել են գերմանական Der Spiegel պարբերականի կողմից, այնուհետև վերարտադրվել են Reuters, AFP, France 24, The Times, The Telegraph և միջազգային այլ լրատվամիջոցներում, լայն լսարանին ներկայացվում են որպես փաստ, ինչը լուրջ մտահոգության տեղիք է տալիս։

«Այս ապատեղեկատվական գործողության հետևում կանգնած ուժերի կեղտոտ մտադրությունն այն է, որ վնաս հասցվի ադրբեջանա-գերմանական հարաբերություններին, որոնք վերջին շրջանում զարգացում են ստացել։ Ադրբեջանի Մեդիայի և հեռարձակման խորհուրդը վճռականորեն դատապարտում է նման ապատեղեկատվական արշավները, որոնք ուղղված են միջազգային տեղեկատվական տարածքում Ադրբեջանին անհիմն կերպով բացասական համատեքստում ներկայացնելուն, և կոչ է անում միջազգային լրատվամիջոցներին խստորեն պահպանել մասնագիտական լրագրության հիմնարար սկզբունքները, այդ թվում՝ ճշգրտության, օբյեկտիվության, վստահելի աղբյուրներին հղում կատարելու և տեղեկատվությունը ստուգելու սկզբունքները, թույլ չտալ իրականությանը չհամապատասխանող տեղեկատվության տարածում և հասարակական կարծիքի մանիպուլյացիա»,- նշվում է հայտարարության մեջ։

Հիշեցնենք՝ ավելի վաղ հաղորդվել էր, որ լրտեսության կասկածանքով ձերբակալված Գերմանիայի արտաքին հետախուզության նախկին ղեկավարը կարող էր տվյալներ փոխանցել Ադրբեջանին։

Թարգմանությունը՝ Էմմա Չոբանյանի