07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Ադրբեջանի ևս մեկ ընդդիմադիր կուսակցություն բոյկոտում է նախագահական ընտրությունները
Քաղաքականություն
25.12.2023 | 18:17
Ադրբեջանի ևս մեկ ընդդիմադիր կուսակցություն հրաժարվել է մասնակցել փետրվարի 7-ին կայանալիք նախագահական արտահերթ ընտրություններին, գրում են ադրբեջանական լրատվամիջոցները։ Ադրբեջանի Դասական Ժողովրդական Ճակատ ընդդիմադիր կուսակցությունը որոշումը կայացրել է դեկտեմբերի 23-ին կայացած արտահերթ համագումարում։ Հաղորդվում է, որ այս որոշումը պայմանավորված է «երկրում արդար քաղաքական մրցակցության համար պայմանների բացակայությամբ»։
«Մենք որոշեցինք չառաջադրել մեր թեկնածուին և չմասնակցել ընտրություններին, քանի որ բոլոր մակարդակների ընտրական հանձնաժողովները գտնվում են իշխանությունների վերահսկողության տակ, բոլորը ղեկավարվում են իշխող կուսակցության նշանակած անձանց կողմից։ Ընդհանուր քաղաքական իրավիճակի, ընդդիմադիր կուսակցությունների համար ծայրահեղ սահմանափակ պայմանների համատեքստում ընտրություններին մասնակցությունը զրկվում է քաղաքական որևէ իմաստից»,- ասել է կուսակցության նախագահ, նախկին պատգամավոր Միրմահմուդ Միրալիօղլուն։
Հիշեցնենք, որ մինչ այս էլ արտահերթ նախագահական ընտրությունները բոյկոտելու մասին էին հայտարարել «Մուսավաթ» ու «Ժողովրդական ճակատ» ընդդիմադիր կուսակցությունները։
Վերջին տվյալներով ընտրական հանձնաժողովը Ադրբեջանի արտահերթ նախագահական ընտրություններին մասնակցելու 15 դիմում է ստացել,․ 7 հայտ արդեն հաստատվել է, 8-ն էլ գտնվում է հաստատման փուլում։ 7 գրանցված թեկնածուներից մեկը Ադրբեջանի գործող նախագահ Իլհամ Ալիևն է։
Էմմա Չոբանյան
