Քաղաքականություն
18.12.2023 | 16:36
Ադրբեջանի գլխավոր ընդդիմադիր կուսակցությունները որոշել են բոյկոտել 2024 թվականի փետրվարի 7-ին կայանալիք արտահերթ նախագահական ընտրությունները։ Մասնավորապես, Ադրբեջանի «Ժողովրդական ճակատ» կուսակցությունը դեկտեմբերի 16-ին կայացած համագումարում որոշել է չմասնակցել նախագահական ընտրություններին։
«Ներկուսակցական քննարկումներից հետո որոշում է կայացվել բոյկոտել ընտրությունները։ Որոշմանը կողմ է քվեարկել համագումարի պատվիրակների բացարձակ մեծամասնությունը, դեմ՝ միայն երկու մասնակից»,- ասվում է հայտարարության մեջ։
Կուսակցությունն այս որոշումը բացատրում է երկրում ազատ, արդար, ժողովրդավարական ընտրություններ անցկացնելու համար պայմանների բացակայությամբ։
«Մենք կողմ ենք ազատ, արդար, ժողովրդավարական ընտրություններին և միշտ պահանջելու ենք նման արդար մրցակցություն։ Սակայն մենք չենք մասնակցի ֆարսին, որը կոչվում է «ընտրություն»։ «Ժողովրդավարության» այդ իմատացիային մենք մասնակից չենք դառնա»,- համագումարի ժամանակ հայտարարել է կուսակցության ղեկավար Ալի Քերիմլին։
Ավելի վաղ էլ ընդդիմադիր «Մուսավաթ» կուսակցությունն էր հայտարարել ընտրություններին չմասնակցելու մասին։ Հայտարարության մեջ ասվում է, որ «Մուսավաթ»-ն իշխանություններին կոչ էր արել ընտրություններից առաջ ստեղծել ժողովրդավարական միջավայր, ազատ արձակել բոլոր քաղբանտարկյալներին, ապահովել հավաքների և խոսքի ազատություն, ապահովել բոլոր քաղաքական ուժերի ներկայացվածությունը ընտրական հանձնաժողովներում։ Սակայն այդ կոչերը ոչ միայն անտեսվել են, այլև արտահերթ նախագահական ընտրություններ նշանակվելուց հետո բռնաճնշումները սաստկացել են։
«Իշխանությունները հանկարծ արտահերթ ընտրություններ նշանակեցին՝ առանց նախնական հանրային քննարկումների։ Այսպիսով, նրանք նվազագույնի հասցրին ընդդիմության և բնակչության դեմոկրատական հատվածի հնարավորությունները։ Սա վկայում է ընտրությունները պաշտոնական ընթացակարգի վերածելու իշխանությունների ցանկության մասին»,- ասվում է հայտարարության մեջ։
Նշվում է, որ այս ամենը հաշվի առնելով՝ «Մուսավաթը» որոշում է կայացրել ընտրություններին չմասնակցել։
Հիշեցնենք, որ Ադրբեջանում հաջորդ նախագահական ընտրությունները պետք է տեղի ունենային 2025 թվականին։ Սակայն նախագահ Իլհամ Ալիևը դեկտեմբերի 7-ին հրամանագիր է ստորագրել 2024 թվականի փետրվարի 7-ին Ադրբեջանում արտահերթ նախագահական ընտրություններ անցկացնելու մասին։
Էմմա Չոբանյան
