Ե՞րբ կխոսի Գագիկ Ծառուկյանը․ նրա խոսնակը խոստացել էր Քոչարյանի կալանավորման շուրջ Ծառուկյանի տեսակետը հայտնել դեռ ժամեր առաջ

Ռոբերտ Քոչարյանի կալանավորմանը շատ արագ արձագանքեցին ԱԺ-ում ներկայացված Հանրապետական և Հայ հեղափոխական դաշնակցություն կուսակցությունները, որոնք հենց 2008 թ․ հանդիսանում էին իշխող կոալիցիայի մաս։ Օրինակ ՀՅԴ-ն, որն այսօր արդեն Փաշինյանի ղեկավարած կառավարության կազմում է, դրանից որևէ կերպ չկաշկանդվելով, շտապեց իր հստակ դիրքորշումն ու մտահոգությունն արտահայտել 2-րդ նախագահի կալանավորման վերաբերյալ։

Ինչ վերաբերում է Հանրապետական կուսակցության դիրքորոշմանը, ապա այն միանգամայն սպասելի էր։ Փոխարենը, շատերի համար անսպասելի էր «Ծառուկյան» դաշինքի լռությունը՝ հաշվի առնելով Ռոբերտ Քոչարյան-Գագիկ Ծառուկյան համատեղ անցած քաղաքական ուղին։

Ռոբերտ Քոչարյանի կալանավորման վերաբերյալ Գագիկ Ծառուկյանի դիրքորոշումը Factor.am-ը փորձեց պարզել նրա մամուլի խոսնակ Իվետա Տոնոյանից։ Այսօր առավոտյան մեզ հետո զրույցում խոսնակը նշեց, որ Գագիկ Ծառուկյանի տեսակետը կատարվածի վերաբերյալ կներկայացնի մեկ ժամ անց։ Սակայն անցավ մի քանի ժամ, աշխատանքային օրն արդեն ավարտվում է, բայց Իվետա Տոնոյանի հետ կապ հաստատել այդպես էլ չի ստացվում․ նա պարզապես անջատում է հեռախոսը։

Նշենք, որ շրջանառվող լուրերը, թե ԲՀԿ-ի ստեղծման ակունքներում կանգնած է եղել Ռոբերտ Քոչարյանը, Գագիկ Ծառուկյանը մշտապես փորձել է հերքել՝ միևնույն ժամանակ, սակայն, հաստատելով, որ ունի ջերմ հարաբերություններ Ռոբերտ Քոչարյանի հետ։

Աղավնի Սուքիասյան