18.02.2026 | 10:32
NYMEX․ Ոսկու գինը նվազել է 1.92%-ով և կազմել 4874.50 դոլար
«ՀՀ-ին զենք տվողները շատանալու են»․ Բաքուն դժգոհում է ՀՀ-Ֆրանսիա սպառազինության գործարքից. ՏԵՍԱՆՅՈՒԹ
Քաղաքականություն
13.11.2023 | 19:40
Ադրբեջանի իշխանություններին անհանգստացնում են Հայաստանի զինված ուժերի համալրումները։ Երեկվանից ադրբեջանական քարոզչամեքենան հրապարակումներ է անում այն մասին, որ Ֆրանսիան Հայաստան Bastion բազմաֆունկցիոնալ զրահամեքենաներ և սարքավորումներ է մատակարարել։ Հրապարակումներն ուղեկցվում են լուսանկարներով, որոնցում վրացական Փոթի նավահանգիստն է և պնդում այն մասին, որ Ֆրանսիայից ժամանած զրահատեխնիկայի խմբաքանակն արդեն շարժվում է Հայաստան։
Հայաստանի Պաշտպանության նախարարության մամուլի խոսնակ Արամ Թորոսյանն այս տեղեկությունների վերաբերյալ Factor TV-ին ասաց՝ Հայաստանի և Ֆրանսիայի՝ պաշտպանության բնագավառում համագործակցության վերաբերյալ պաշտոնական հաղորդագրություններից և հայտարարություններից զատ՝ այս պահին որևէ տեղեկություն չի կարող հայտնել։
Հիշեցնենք՝ Երևանն ու Փարիզը պաշտպանական ոլորտում համագործակցության վերաբերյալ պայմանագիր են ստորագրել այս տարվա հոկտեմբերի 23-ին։ Սուրեն Պապիկյանն այդ նպատակով այցելել էր Փարիզ, որտեղ էլ ֆրանսիացի գործընկերոջ հետ ստորագրել էր համագործակցության փաստաթղթերը։
Ադրբեջանի ԱԳ խոսնակն այսօր հայտարարել է, թե պետք է վերջ դրվի տարածաշրջանի ռազմականացմանը․ «Հայաստանը և Ֆրանսիան պետք է վերջ դնեն տարածաշրջանում սպառազինության և ռազմականացման քաղաքականությանը, և այդ երկրները պետք է վերջապես հասկանան, որ տարածաշրջանում խաղաղությանն ու համագործակցությանն այլընտրանք չկա»։
Բաքուն զենքի գնումը համարում է Հայաստանի և Ադրբեջանի միջև հարաբերությունների կարգավորմանն ուղղված ջանքերի խոչընդոտում։ Այնինչ, Ադրբեջանն ինքն է ռազմական ծախսերին ուղղված բյուջեն մեծացնում․ 2024 թվականին այն կկազմի 3,7 մլրդ դոլար, իսկ Հայաստանի ռազմական բյուջեն կազմում է 1,4 մլրդ դոլար՝ 2,5 անգամ զիջելով Ադրբեջանի բյուջեին։
Քաղաքական մեկնաբան Արմեն Հովհաննիսյանի խոսքով՝ Ալիևն իր ժողովրդին խոսացել էր Հայաստանի կործանում, ինչը, սակայն, տեղի չի ունենում։ Ադրբեջանի ԱԳՆ-ի այս հայտարարությունը, ըստ Հովհաննիսյանի, դրա վկայությունն է։ Իսկ ահա ադրբեջանական հարցերով փորձագետ Տաթևիկ Հայրապետյանի խոսքով՝ այս հայտարարությունները Երևանի թուլությունն են մատնանշում։
44-օրյա պատերազմից հետո Հայաստանը սպառազինություն է ձեռք բերում Հնդկաստանից, Ֆրանսիայից, իշխանության ներկայացուցիչները հայտնում են նաև Շվեդիայի ու Նորվեգիայի հետ բանակցությունների մասին։ Արմեն Հովհաննիսյանի խոսքով՝ այս ցանկն առաջիկայում ընդլայնվելու է։
Հայաստանի ԱԳՆ-ն այսօր ամբողջ աշխատանքային օրվա ընթացքում չի չարձագանքել Բաքվից հնչող հայտարարություններին, իսկ մեր զանգերը մնացին անպատասխան։
Մանրամասները՝ տեսանյութում։
Նարեկ Կիրակոսյան
