18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Որո՞նք են հաշմանդամություն ունեցող անձանց աշխատանքային իրավունքները․ ՏԵՍԱՆՅՈՒԹ
Հասարակություն
26.10.2023 | 13:06
Հաշմանդամություն ունեցող աշխատողների անվտանգությունը և առողջության պահպանումը երաշխավորվում են օրենքով: Արգելվում է խտրականությունը հաշմանդամություն ունենալու պատճառով:
Աշխատանքի ծավալների կամ հաստիքների կրճատման ժամանակ հավասար պայմանների առկայության դեպքում աշխատանքում մնալու նախապատվությունը տրվում է հաշմանդամություն ունեցող աշխատողին, հարազատին, որը զբաղվում է ֆունկցիոնալության խորը աստիճանի սահմանափակմամբ հաշմանդամություն ունեցող նախկին զինծառայողի խնամքով:
Մասնագիտական հիվանդության կամ աշխատանքային խեղման պատճառով աշխատունակությունը կորցրածի աշխատատեղը և պաշտոնը պահպանվում են մինչև աշխատունակության վերականգնումը կամ հաշմանդամություն ունեցող անձ ճանաչելը:
Աշխատատեղը պահպանվում է, եթե անձը ժամանակավոր անաշխատունակության մեջ է գտնվել ոչ ավելի, քան վեց ամիս անընդմեջ, կամ մեկ տարվա ընթացքում` ոչ ավելի, քան 180 օր:
Հաշմանդամություն ունեցող աշխատողը կարող է դիմել գործատուին`օրենսդրությամբ սահմանված կարգով խելամիտ հարմարեցումներ ստանալու համար: Խելամիտ հարմարեցումներ են աշխատավայրը մատչելի դարձնելը, աշխատանքային ճկուն գրաֆիկ սահմանելը, աջակցող սարքեր և ծրագրեր ձեռք բերելը, պարտականությունները վերանայելը:
Հաշմանդամություն ունեցող աշխատողի պահանջով` բժշկական եզրակացության հիման վրա կարող է սահմանվել ոչ լրիվ աշխատանքային օր կամ շաբաթ: Արտաժամյա աշխատանքի նա կարող է ներգրավվել միայն իր գրավոր համաձայնությամբ, եթե բժշկական եզրակացությամբ արգելված չէ:
Հաշմանդամություն ունեցող աշխատողին կարող է տրամադրվել չվճարվող արձակուրդ՝ բժշկական եզրակացությամբ սահմանված ժամկետներում, սակայն ոչ ավելի, քան 30 աշխատանքային օր տարվա ընթացքում:
