30.04.2026 | 19:12
Ադրբեջանում Ուկրաինայի հարցով բանակցություններ անցկացնելու մասին դեռևս խոսք չկա. Պեսկով
Ահաբեկչությունը երբեք արդարացում չունի․ Բայդենը զանգահարել է Նեթանյահուին
07.10.2023 | 19:42
ԱՄՆ նախագահ Ջո Բայդենը զանգահարել է Իսրայելի վարչապետ Բենյամին Նեթանյահուին և հայտարարել, որ ԱՄՆ-ը պաշտպանում է Իսրայելի ինքնապաշտպանության իրավունքը:
BBC-ի ռուսական ծառայության փոխանցմամբ՝ Նեթանյահուն շնորհակալություն է հայտնել ԱՄՆ նախագահին աջակցության համար և ասել, որ Իսրայելը պետք է ռազմական գործողություն իրականացնի՝ հաղթանակ տանելու համար:
Ավելի վաղ ԱՄՆ պետքարտուղար Էնթոնի Բլինքենը հայտարարել էր, որ Վաշինգտոնը «անվերապահորեն դատապարտում է ՀԱՄԱՍ-ի ահաբեկիչների սարսափելի հարձակումները Իսրայելի վրա»:
«Ահաբեկչությունը երբեք արդարացում չունի։ Մենք համերաշխ ենք Իսրայելի կառավարության և ժողովրդի հետ և ցավակցություն ենք հայտնում այդ հարձակումների հետևանքով զոհված իսրայելցիներին»,- գրել է նա X-ի իր միկրոբլոգում։
Բլինքենի խոսքով՝ ԱՄՆ-ը սերտ կապ կպահպանի իսրայելցի գործընկերների հետ:
Ավելի վաղ տարբեր երկրների առաջնորդներ ևս արձագանքել են Իսրայելի վրա ՀԱՄԱՍ-ի հարձակմանը։
Պաղեստինյան արմատականները շաբաթ առավոտյան ներխուժել են Իսրայելի տարածք Գազայի հատվածի զանգվածային գնդակոծությունների ֆոնին:
Իսրայելի պաշտպանության բանակը հայտարարել էր, որ սկսել է «Երկաթե սրեր» գործողությունը՝ ի պատասխան Իսրայելի վրա ՀԱՄԱՍ-ի անսպասելի հարձակման․ 70 մարդկային կորուստ կա Իսրայելում, 198-ը՝ Գազայի հատվածում․ կան հարյուրավոր վիրավորներ։
