20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Աշխարհի արձագանքը ՀԱՄԱՍ-ի հարձակմանը. դատապարտումից մինչև շնորհավորանքներ
Քաղաքականություն
07.10.2023 | 19:19
Իսրայելում և Գազայի հատվածում իրավիճակի սրման վերաբերյալ հայտարարություններ են հրապարակում քաղաքական գործիչներն ու պաշտոնյաներն ամբողջ աշխարհում: Որոշ երկրներ աջակցություն են հայտնում Իսրայելին, մյուսները՝ զսպվածության կոչ են անում։ BBC-ի ռուսական ծառայության փոխանցմամբ՝ ՀԱՄԱՍ-ի զինյալներին աջակցելու համար հանդես է եկել Իրանը։
Ֆրանսիայի նախագահ Էմանուել Մակրոնն իր թվիթերյան էջում աջակցություն է հայտնել Իսրայելին, և «վճռականորեն դատապարտել Իսրայելի վրա ահաբեկչական հարձակումները»:
Եվրամիության արտաքին քաղաքական գերատեսչության ղեկավար Ժոզեպ Բորելը կոչ է արել անհապաղ ազատ արձակել պատանդներին, որոնք ենթադրաբար գերեվարվել և Գազա են տեղափոխվել հարձակման ժամանակ: «Դա միջազգային իրավունքի խախտում է։ Պատանդները պետք է անհապաղ ազատ արձակվեն»,- գրել է նա X-ի իր միկրոբլոգում։
Մեծ Բրիտանիայի արտաքին գործերի նախարար Ջեյմս Քլևերլին հայտարարել է, որ իր երկիրը «միանշանակ դատապարտում է ՀԱՄԱՍ-ի սարսափելի հարձակումը Իսրայելի քաղաքացիական բնակչության վրա»:
«Մեծ Բրիտանիան միշտ կպաշտպանի Իսրայելի ինքնապաշտպանության իրավունքը»,- գրել է նա:
Մեծ Բրիտանիայի վարչապետ Ռիշի Սունակն իր հերթին հայտարարել է, որ կապի մեջ է Իսրայելի իշխանությունների հետ: Իսրայելի վրա ՀԱՄԱՍ-ի հարձակումը դատապարտել են նաև Շվեդիայի և Իսպանիայի ԱԳ նախարարները:
Թուրքիայի նախագահ Ռեջեփ Էրդողանը զսպվածության կոչ է արել իսրայելցիներին և պաղեստինցիներին:
«Մենք կողմերին կոչ ենք անում զսպվածություն և խուսափել չմտածված քայլերից, որոնք կարող են հանգեցնել լարվածության սրման»,- նրա խոսքը մեջբերել է Anadolu գործակալությունը: Ընդ որում, ինչպես հաղորդում է գործակալությունը, Էրդողանը հայտարարել է, որ դեմ է «Ալ-Աքսա մզկիթի դեմ ցանկացած հարձակման»: ՀԱՄԱՍ-ն իր գործողությունն անվանել է «Ալ-Աքսայի ջրհեղեղ»՝ մեղադրելով Իսրայելին Երուսաղեմի Տաճարի լեռան վրա գտնվող մզկիթն օկուպացնելու և ներխուժելու մեջ:
Սաուդյան Արաբիայի ԱԳՆ-ն կոչ է արել երկու կողմերին դադարեցնել արյունահեղությունը։
Իրանի գերագույն առաջնորդի խորհրդականը պաղեստինցի գրոհայիններին շնորհավորել է Իսրայելի վրա հարձակում սկսելու կապակցությամբ, հայտնում է Jerusalem post-ը՝ վկայակոչելով իրանական ԻՍՆԱ լրատվական կայքը: Ռահիմ Սաֆավին խոստացել է աջակցել պաղեստինցիներին։
Ռուսաստանի Անվտանգության խորհրդի փոխնախագահ Դմիտրի Մեդվեդևը տելեգրամյան իր ալիքում գրառում է կատարել, որում բավական ոչ պաշտոնական ձևով քննադատել է ԱՄՆ քաղաքականությունը Մերձավոր Արևելքում:
«ՀԱՄԱՍ-ի և Իսրայելի միջև ռազմական բախումների սկիզբը Դատաստանի օրվա պատերազմի մեկնարկի 50-ամյակի օրը իրադարձություն էր, որը կարելի էր սպասել: Ահա թե ինչով պետք է զբաղվեին Վաշինգտոնն ու նրա դաշնակիցները։ Իսրայելի և Պաղեստինի միջև հակամարտությունը տևում է տասնամյակներ։ Եվ ԱՄՆ-ն այնտեղ առանցքային խաղացող է»,- գրել է Մեդվեդևը։
