«Ես մտադիր չեմ դատի տալ Արփինե Հովհաննիսյանին»․ Դանիել Իոաննիսյան. ՏԵՍԱՆՅՈՒԹ

Factor TV-ի զրուցակիցն է վարչապետին առընթեր Ընտրական օրենսդրության բարեփոխումների հանձնաժողովի քարտուղար Դանիել Իոաննիսյանը

-Այսօր մեծ աղմուկ է հանել ԸՕ բարեփոխումներին նվիրված ԱԺ նիստում Ձեր խոսքի ընթացքում Արփինե Հովհաննիսյանի արած հայտարարությունը, ով իր գործընկերների հետ զրույցում, հավանաբար տեղյակ չլինելով, որ իր բարձրախոսը անջատված չէ, ասում է․ «էս մտավոր հետամնացի հետ ի՞նչ քննարկենք»։ Տիկին Հովհաննիսյանն արդեն ներողություն է խնդրել եւ ասել, որ Ձեզ նկատի չի ունեցել։ Դուք, սակայն, ասել եք, որ , ըստ էության, ձեզ նկատի ունի։ Տիկին Հովհաննիսյանի պարզաբանումը Ջեզ համար համոզիչ չէ՞ր։

-Ես բավականին բարձր կարծիքի եմ Արփինե Հովհաննիսյանի հայոց լեզվի իմացության եւ մտքերը ճիշտ ձեւակերպելու ունակության մասին։ Եվ Արփինե Հովհաննիսյանի խոսքերից հստակ է, որ խոսքն ինչ-որ անձի մասին է, եւ քանի որ էդ ընթացքում ես եմ խոսում, ձեռքերի ժեստերը մոտավորապես իմ ուղղությամբ է, ես ենթադրում եմ, որ խոսքն իմ մասին է։ Կոնտեքստից կարելի է էդ եզրահանգման գալ։ Արփինե Հովհաննիսյանն ասում է, որ իրավիճակն է այդպես նկարագրում, որպես մտավոր հետամնաց իրավիճակ։ Եվ մտավոր հետամնաց իրավիճակի հետ ի՞նչ են քննարկում։ Ես մի քիչ թերահավատ եմ մոտենում այդ մեկնաբանմանը։

-Արփինե Հովհաննիսյանի այդ արտահայտությունը, որը ձեր կարծիքով ուղղված էր Ձեզ, չի տարածվու՞մ նաեւ կառավարության վրա, որը Ձեզ նշանակել է ԸՕ բարեփոխումների հանձնաժողովի քարտուղար։

-Ես չեմ կարծում, որ այստեղ հարցն այն է, թե իմ հասցեին ինչ ասվեց։ Էնպես չի, որ ես դրանից կաշկանդվեցի եւ նեղված եմ։ Հարցն այն է, որ դա խորհրդարանում հնչող բառապաշար չի։ Նախկինում էլ նման դեպքեր եղել են, դա ողջունելի չէ։

-Երեկ առողջապահության նախարարը, խոսելով հաշմանդամների խնդիրներից, ասաց, որ եթե մենք ուզում ենք լինել հասուն հասարակություն, պետք է մեծ ուշադրություն դարձնենք հաշմանդամների խնդիրներին, այլապես կմնանք թերհաս հասարակություն։ Արփինե Հովհաննիսյանի այդ արտահայտությունը եւ նախարարի այս խոսքերը բառապաշարային իմաստով չե՞ն լրացնում միմյանց։

-Չեմ կարծում, որովհետեւ խնդիրը՝ կապված հաշմանդամների հանդեպ պետական քաղաքականության վերաբերմունքի հետ, կա։ Չկա հանրային մեծ պահանջ էդ խնդիրը լուծելու։ ԸՕ քննարկումների սահմաններում մտածում էինք, թե ինչ անենք, որ հաշմանդամների համար հասանելի դարձնենք քվեարկության իրավունքից օգտվելը։ Չեմ կարծում, որ հասարակությունից նման պահանջ կա։ Ես չգիտեմ, թե ինչ կոնտեքստում է առողջապահության նախարարն ասել։

-Արտահայտությունը՝ մտավոր հետամնաց, հնչել է ԱԺ փոխնախագահի մակարդակով։ Ձեր կարծիքով ի՞նչպիսի պատասխանատվության պետք է ենթարկվի Արփինե Հովհաննիսյանը՝ էթիկական, քաղաքական․․․

-Առաջին հերթին խոսքը քաղաքական պատասխանատվության մասին է։ Ուղղակի պետք է հանրությունը տեսնի, իր գնահատականը տա, իր եզրակացությունները կատարի։ Ես մտադիր չեմ Արփինե Հովհաննիսյանին դատի տալ, փոխհատուցում պահանջել։ Ես ընդդիմությանը դատի տալու ջատագով չեմ։ Անգամ եթե այս արտահայոտթյունն արվել է ոչ թե իմ հասցեին, այլ քննարկման հասցեին, միգուցե ավելի վա՞տ։

-Եվ դուք իսկապե՞ս ջերմ հարաբերություններ ունեք միմյանց հետ։

-Մենք բավականին բարիդրացիական հարաբերություններ ունեինք։

-Կպահպանվե՞ն էդ հարաբերությունները։

-Դժվար։

Հարցազրույցն ամբողջությամբ դիտեք տեսանյութում:

Մհեր Արշակյան