24.11.2024 | 16:07
1 մլրդ դրամ՝ Երևանի ու մարզերի թատրոնների, համերգային դահլիճների, նվագախմբերի համար գույք, տեխնիկա գնելու համար․ ՏԵՍԱՆՅՈՒԹ
ՌԴ ՆԳՆ-ն հետախուզում է հայտարարել լրագրող Կարեն Շահինյանի նկատմամբ
Քաղաքականություն
18.08.2023 | 22:30
ՌԴ Ներքին գործերի նախարարությունը հետախուզում է հայտարարել լրագրող Կարեն Շահինյանի նկատմամբ, գրում է Mediazona-ն։
Ինքը՝ Շահինյանը, Mediazona-ի հետ զրույցում ասել է, որ դեռևս չգիտի, թե ինչ հոդվածով է քրեական գործ հարուցվել իր դեմ։
«Ես դեռ չգիտեմ, թե որն է իմ դեմ հարուցված քրեական գործի էությունը, գիտեմ միայն, որ այն վարվում է ՆԳՆ Մեշչանսկի շրջանի քննչական վարչությունում։ Փաստաբանիս հոդվածն էլ չեն ասում»,- ասել է նա։
Instagram-ում Շահինյանը գրել է, որ ծրագրում էր մեկնել Ղրղզստան, սակայն որոշել է հրաժարվել։
«Այնուամենայնիվ, իզուր չեմ հրաժարվել Ղրղզստան մեկնելուց։ Հենց այսօր ինձ կձերբակալեին և կուղարկեին Ռուսաստան՝ բանտ»,- նշել է լրագրողը։
Ե՛վ Ղրղզստանը, և՛ Ռուսաստանը Հավաքական անվտանգության պայմանագրի կազմակերպության (ՀԱՊԿ) անդամ են, որն ունի ընդհանուր որոնողական բազա։
Լրագրողի նկատմամբ քրեական հետապնդման մասին հայտնի դարձավ հուլիսին, երբ Rosfinmonitoring-ը նրան ներառեց «ահաբեկիչների և ծայրահեղականների ցուցակում»։ Այս ցուցակում աստղանիշով նշված են այն մարդկանց անունները, որոնց նկատմամբ քրեական գործ է հարուցվել ահաբեկչության հոդվածով։ Շահինյանի անունը նման աստղանիշով չէ, հետևաբար, նրա դեպքում, ամենայն հավանականությամբ, խոսքը «ծայրահեղականության» հոդվածի մասին է։
