02.11.2024 | 20:53
Բացվեց «Լույսեր» բնակելի համալիրը՝ կանաչապատ բակերով և նորարար լուծումներով. ՏԵՍԱՆՅՈՒԹ
Թուրքիայի իշխանություններին բարկացրել է «հայերի միջամտությամբ» Disney+ հարթակում «Աթաթուրք» սերիալի ցուցադրման չեղարկումը․ քննություն է սկսվել
Քաղաքականություն
03.08.2023 | 18:38
Թուրքիայում Disney+-ի հարթակում «Աթաթուրք» սերիալի ցուցադրության չեղարկման շուրջ բուռն քննարկումները շարունակվում են։ Մասնավորապես, Թուրքիայի Ռադիոյի և հեռուստատեսության բարձրագույն խորհուրդը (RTÜK) որոշել է հետաքննություն սկսել և բացատրություն պահանջել Disney+-ից այն պնդումների ֆոնին, որ հարթակը չեղարկել է իր իսկ նկարահանած «Աթաթուրք» սերիալի ցուցադրությունը, հայտարարել է RTÜK-ի նախագահ Էբուբեքիր Շահինը։
Նա նշել է, որ Աթաթուրքը շատ կարևոր ազգային գործիչ է, ազգային արժեք Թուրքիայում, և տեղեկացրել, որ ուշադրությամբ հետաքննվում են այն պնդումները, թե սերիալը չեղարկվել է «հայկական լոբբիի միջամտության արդյունքում»։
Սերիալի չեղարկմանն անդրադարձել են նաև Թուրքիայի իշխանություններն ու քաղաքական տարբեր ուժերի գործիչներ։
«Ամոթալի է, որ ամերիկյան հարթակը ենթարկվել է հայկական լոբբիի ճնշմանը և չեղարկել «Աթաթուրք» հեռուստասերիալի հեռարձակումը»,- ասել է իշխող «Արդարություն և զարգացում» կուսակցության խոսնակ Օմեր Չելիքը։
«Ինչպես նախկինում տարբեր առիթներով հայտարարել ենք՝ ԱՄՆ-ում, այսպես կոչված, ցեղասպանության ցանցը պատմական իրադարձություններն օգտագործում է որպես ստի քաղաքականության գործիք։ Այս լոբբիի միակ նպատակն է կանխել Հայաստան-Թուրքիա հարաբերությունների կարգավորումը, ինչպես բազմիցս նկատվել է։ Այդ ցանցերի գործունեությունը ոչ մի ազդեցություն չունի Աթաթուրքի և Թուրքիայի Հանրապետության վրա։ Ամոթ նրանց, որոնք ենթարկվում են այս ցանցերին»,- գրել է Չելիքը թվիթերյան իր էջում։
Գլխավոր ընդդիմադիր Ժողովրդահանրապետական կուսակցության (CHP) պատգամավոր Մուսթաֆա Սարըգյուլը կոչ է արել «Թուրքիայի և աշխարհի բոլոր քաղաքացիներին» բոյկոտել Disney+ հարթակը։
Ընդդիմադիր «Լավ» (İYİ) կուսակցության խոսնակ Քյուրշաթ Զորլուն, «Հայրենիք» (Մեմլեքեթ) կուսակցության նախագահ Մուհարրեմ Ինջեն, Դեմոկրատական կուսակցության փոխնախագահ Իլայ Աքսոյը ևս քննադատել են Disney+-ին։
Ամերիկյան հարթակի թուրքական ծառայության պաշտոնյան էլ ասել է, որ իրենք արձագանքների վերաբերյալ զեկույց են պատրաստել Disney-ի արտասահմանյան գրասենյակին իրենց ստացած արձագանքների վերաբերյալ։ Նա նշել է, որ իրավիճակի մասով քննություն է տարվում։
Ամերիկայի Հայ դատի հանձնախումբն (ANCA) անցյալ ամիս կոչ էր արել Disney+-ին չեղարկել Աթաթուրքի մասին սերիալը, որի թրեյլերն արդեն հրապարակվել էր։
Այժմ պարզվում է, որ հենց ամերիկյան հարթակի կողմից նկարահանված Մուսթաֆա Քեմալ Աթաթուրքին նվիրված սերիալը նախատեսվում է հեռարձակել ոչ թե Disney+-ով, այլ թուրքական FOX հեռատեսությամբ և երկրի կինոթատրոններում։
Տեղեկություններ են կան, որ Disney-ը ստեղծված իրավիճակի շուրջ պատրաստվում է պաշտոնական հայտարարությամբ հանդես գալ։
Էմմա Չոբանյան
