Ադրբեջանի ԱԳՆ-ն Արցախ ուղարկված հումանիտար օգնությունը որակել է Հայաստանի ու ԵՄ դիտորդական առաքելության կողմից կազմակերպված «սադրանք»

Ադրբեջանի ԱԳՆ արձագանքել է Հայաստանից Արցախ մարդասիրական բեռների տեղափոխմանը՝ այն անվանելով  «սադրանք»։

«Առանց մեր երկրի հետ համաձայնեցման հայկական կողմից ավտոշարասյունների՝ «մարդասիրական բեռների» պատրվակով մուտքը դեպի ինքնիշխան ադրբեջանական տարածքներ ոտնձգություն է «Ադրբեջանի տարածքային ամբողջականության և ինքնիշխանության նկատմամբ, հերթական սադրանքը Լաչինի սահմանային անցակետի դեմ»»,- ասվում է Բաքվի ԱԳՆ հաղորդագրության մեջ։

Բաքուն Հայաստանին մեղադրում է միջազգային հանրությանը մոլորեցնելու մեջ։

«Հայկական կողմի նման քայլը Մոսկվայում բանակցություններից անմիջապես հետո, որտեղ, ի թիվս այլ հարցերի, մանրամասն քննարկվել է ներկա իրավիճակը, վկայում է այն մասին, որ այս երկիրը անկեղծ չէ գործընթացի նկատմամբ և մտադիր է մոլորության մեջ գցել միջազգային հանրությանը՝ սրելով իրավիճակը»,- ասվում է  հայտարարության մեջ։

Ադրբեջանը, կրկնելով իր քարոզչական թեզերը, նշում է, թե «Հայաստանի հայտարարությունները տարածաշրջանում հումանիտար լարված իրավիճակի» մասին ոչ այլ ինչ են, քան մանիպուլյատիվ և անօրինական գործողությունները շարունակելու մտադրություն»։

Նշվում է, որ հայկական կողմը մերժել է ադրբեջանական առաջարկները, այդ թվում՝ Աղդամի ճանապարհից ու այլ ուղիներից օգտվելուց։

Ի դեպ, Բաքուն նաև Հայաստանում  ԵՄ դիտորդական առաքելությանն է մեղադրում «սադրանքի» մեջ։

«Նշված «սադրանքին» մասնակցել են նաև Հայաստանում Եվրամիության առաքելությունը և դիվանագիտական ​​կորպուսը՝ ցույց տալով, որ դա նախապես ծրագրված քայլ է»,- ասվում է հայտարարությունում։

Էմմա Չոբանյան