«Տաշիր գրուպի» սեփականատեր Սամվել Կարապետյանի գործունեությունը հայտնվել է Կառավարության խոշորացույցի տակ

«Տաշիր գրուպի» սեփականատեր Սամվել Կարապետյանի գործունեությունը հայտնվել է Կառավարության խոշորացույցի տակ։ Երեկվա նիստի օրակարգ մտած երկու հարցերն ուղիղ կապ ունեին ռուսաստանցի գործարարի բիզնես գործունեության հետ։

Խոսքը, մասնավորապես,  վերաբերում է  ՀՀ էներգետիկայի և բնական պաշարների նախարար Արթուր Գրիգորյանի ներկայացրած՝  2018 թվականի պետական բյուջեում և ՀՀ կառավարության 2017 թվականի դեկտեմբերի 28-ի N 1717-Ն որոշման մեջ փոփոխություններ և լրացումներ կատարելու մասին որոշման նախագծին, ըստ որի, Գերմանիայի զարգացման վարկերի բանկի աջակցությամբ իրականացվող՝ Գյումրի-2 ենթակայանի վերականգնման ծրագրի իրականացման արդյունքում տնտեսվել է 1,477.6 հազ. եվրո, որը Գերմանիայի զարգացման  բանկի (KfW) և ՀՀ կառավարության համաձայնությամբ նպատակաուղղվել է ենթակայանների սպասարկման համար անհրաժեշտ գործիքների և մեքենա-մեխանիզմների ձեռքբերմանը:

Հետաքրքրական է, որ իրականացված միջազգային մրցույթի արդյունքում «Բարձրավոլտ էլեկտրացանցեր» ՓԲԸ-ի  և «Կալուգագլավսնաբ» ԲԲԸ-ի միջև կնքվել է մեքենա-մեխանիզմների և պահեստամասերի ձեռքբերման պայմանագիր՝ ընդհանուր 1,432.9 հազ. եվրո գումարով: 

Հարցի զեկուցող նախարարից  վարչապետը հետաքրքրվեց, թե ինչպես է որոշվել, որ տնտեսված 1,477,6 հազար եվրոն պետք է ուղղվեր  մեքենա-մեխանիզմների ձեռքբերմանը և ինչպես է որոշվել, որ պայմանագիրը պետք է կնքվի «Բարձրավոլտ էլեկտրացանցեր» ՓԲԸ և «Կալուգագլավսնաբի» միջև։ 

Վարչապետի այս մտահգությունն անտեղի չէր, քանի որ հայտնի է որ և՛ ԲԷՑ-ը, և՛ «Կալուգագլավսնաբ» ԲԲԸ-ն պատկանում են նույն մարդուն՝ Սամվել Կարապետյանին, ով  1997 թվականին ընտրվել է «Կալուգագլավսնաբ» ԲԲԸ-ի նախագահ։ 

Կառավարությունը մեկ այլ որոշմամբ սահմանեց նոր կարգ՝ Սևանա լճից սահմանված չափից ավել բաց թողած ջրի հաշվին արտադրված էլեկտրաէներգիայի քանակության և ՀԷՑ-ում դրա վաճառքից ստացած շահույթի չափը հաշվելու համար։

Փաստորեն, Կառավարությունը նաև ուշադիր կհետևի հավելյալ բաց թողնված ջրի հաշվին ՀԷՑ-ի սատացած շահույթներին՝ թույլ չտալով դրանք թաքցնել։