Երեք ընդդիմադիր կուսակցություններ դիմել են Վրաստանի ԿԸՀ՝ իրենց պատգամավորական ցուցակները չեղարկելու համար

«Ուժեղ Վրաստանն» ու «Միասնություն-Ազգային շարժումը» այսօր դիմել են Կենտրոնական ընտրական հանձնաժողով՝ պատգամավորական ցուցակները չեղարկելու և դրանից հետո մանդատներից հրաժարվելու պահանջով, փոխանցում է Newsgeorgia-ն։

«Քանի որ մենք չենք ճանաչում այս ընտրությունների արդյունքները, հրաժարվում ենք մեր մանդատներից»,- ասել է Ազգային շարժման նախագահ Թինա Բոկուչավան։

«Ընդդիմությունը հաղթեց այս ընտրություններում, դրանում ոչ մի կասկած չպետք է լինի։ Բիձինա Իվանիշվիլիի գլխավորությամբ այս խայտառակ իշխանությունը գողացավ ընդդիմության ձայները, յուրացրեց դրանք և վրաց ժողովրդին զրկեց դեպի Եվրոպա տանող ճանապարհից։ Մենք՝ Ուժեղ Վրաստանը, չենք պատրաստվում լեգիտիմություն տալ այս խորհրդարանին»,- իր հերթին ասել է «Լելո» կուսակցության առաջնորդ Մամուկա Խազարաձեն։

Նա վստահություն է հայտնել, որ ընդդիմությանը կհաջողվի հասնել նոր ընտրությունների նշանակման, այդ թվում՝ բողոքի ցույցերի միջոցով։

Բոկուչավան իր հերթին նշել է ընդդիմության միասնականության մասին։

«Ուրախ եմ, որ դիրքորոշումն այս առումով լիովին միասնական է։ Պահանջում ենք ազատ, պրոֆեսիոնալ Կենտրոնական ընտրական հանձնաժողովի անցկացրած նոր ընտրություններ։ Այսպես մենք կվերադարձնենք Վրաստանի եվրոպական հեռանկարը»,- ասել է Բոկուչավան։

Ավելի վաղ «Հանուն փոփոխությունների» կոալիցիան էր դիմել ԿԸՀ՝ ցուցակները չեղարկելու համար։ Ընդդիմությունը բացատրում է, որ հաջորդ քայլը կլինի մանդատներից հրաժարվելու մասին Վրաստանի խորհրդարանի նախագահին անհատական ​​դիմումների ներկայացումը։

Թարգմանությունը՝ Տաթև Ֆռանգյանի