19.02.2026 | 21:27
Երևանի 3 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
ՀՀ-ն շահագրգռված է ենթակառուցվածքների ապաշրջափակմամբ. կա որոշակի առաջընթաց. Միրզոյան․ ՏԵՍԱՆՅՈՒԹ
Քաղաքականություն
14.06.2023 | 18:59
ԱԺ-Կառավարություն հարցուպատասխանի ժամանակ ԱԺ «Քաղաքացիական պայմանագիր» խմբակցության պատգամավոր Լիլիթ Մինասյանն ԱԳ նախարար Արարատ Միրզոյանից հետաքրքրվել է` ի՞նչն է պատճառը, որ Թուրքիայի նախագահը Հայաստանի սուվերեն տարածքով անցնող ճանապարհին հերթական անգամ տալով միջանցքային տրամաբանություն` խնդիր է համարել ոչ թե Հայաստանի, այլ Իրանի դիրքորոշումը:
Նշենք, որ այսօր՝ հունիսի 14-ին, պատասխանելով Նախիջևանը Ադրբեջանին կապող «Զանգեզուրյան միջանցքին» վերաբերող հարցին՝ Թուրքիայի նախագահ Ռեջեփ Էրդողանն ասել է, թե դրան դեմ է ոչ թե Հայաստանը, այլ Իրանը։ «Այս հարցում Իրանի մոտեցումը հիասթափեցնում է մեզ և Ադրբեջանին։ Ես ցանկանում եմ, որ մենք կարողանանք շուտով հաղթահարել այդ խնդիրը։ Եթե Իրանը դրական մոտեցում ցուցաբերի, ապա Թուրքիան, Իրանը և Ադրբեջանը կկապվեն միմյանց հետ, և մենք կարող ենք ցամաքային և երկաթուղային ճանապարհներով Պեկին-Լոնդոն ուղի ունենալ», – ասել է Էրդողանը։
Այս հայտարարության վերաբերյալ պատգամավորի դիտարկումներին ի պատասխան՝ Արարատ Միրզոյանը նշեց, որ չի մեկնաբանի Թուրքիայի նախագահի` ասուլիսում հնչեցրած հայտարարությունը, հատկապես այն հատվածը, որը վերաբերում է երրորդ երկրներին և նրանց հնարավոր ինտեգրացիային կամ չինտեգրացիային:
ԱԳ նախարարն անդրադարձավ տարածաշրջանային ենթակառուցվածքների ապաշրջափակման հարցին` վերահաստատելով այն դիրքորոշումը, որ Հայաստանը մեծապես շահագրգռված է տարածաշրջանում տրանսպորտային, տնտեսական ենթակառուցվածքների ապաշրջափակմամբ և վերագործարկմամբ:
Միրզոյանի խոսքով՝ ենթակառուցվածքների ապաշրջափակումը պետք է տեղի ունենա մի քանի հայտնի սկզբունքների հիման վրա: «Ակնհայտ է, որ այս ենթակառուցվածքները պետք է ապաշրջափակվեն մի քանի հայտնի սկզբուքներով ինչպիսիք են՝ այն երկրների ներքո պետք է գործեն, որոնք այդ տարածքով անցնում են։ Ենթակառուցվածքները պետք է գտնվեն այն երկրների իրավազորությունների ներքո, որոնց տարածքով անցնում են։ Ենթակառուցածները պետք է բացվեն հավասարության և փոխադարձության սկզբունքների հիման վրա»։
Արտգործնախարարը հավելեց, որ իր տպավորությամբ՝ որոշակի առաջընթաց կա տարածաշրջանային ապաշրջափակման հարցում։ Նախարարը մեկ անգամ ևս վերահաստատեց, որ Հայաստանը շահագրգռված է ենթակառուցվածքների վերագործարկմամբ, այդ թվում՝ Թուրքիայի նախագահի մեջբերած՝ Պեկին-Լոնդոն լոգիստիկ անցումների մաս կազմելով։
«Հայկական խաչմերուկի կոնցեպտում այս միջազգային ենթակառուցվածները տեղավորվում են մեր ծրագրի մեջ»,-եզրափակեց Միրզոյանը։
Մանրամասները` տեսանյութում:
