Երանոս գյուղում ընթանում են ներհամայնքային ճանապարհների ասֆալտապատման աշխատանքներ

Գեղարքունիքի մարզի Մարտունի համայնքի Երանոս գյուղում ՀՀ կառավարության կողմից 2022 և 2023 թվականներին իրականացվող սուբվենցիոն ծրագրերի շրջանակներում ընթանում են թիվ 12 փողոցի և Վարդաձորի խճուղու ասֆալտապատման աշխատանքները։ Ինչպես տեղեկացրին Մարտունու համայնքապետարանի աշխատակազմից, Երանոսի 12-րդ փողոցի ասֆալտապատման աշխատանքներն իրականացվում են ՀՀ կառավարության կողմից 2022 թվականին իրականացվող սուբվենցիոն ծրագրերի շրջանակներում՝ 3-րդ փողոցի ասֆալտապատման աշխատանքների համատեղ ընդգրկմամբ։

Ծրագրի պայմանագրային արժեքը կազմել է 104 միլիոն դրամ, որի 50 տոկոսը հատկացրել է ՀՀ կառավարությունը, 50 տոկոսը՝ Մարտունու համայնքապետարանը։ Երանոսի 3-րդ փողոցի ասֆալտապատման աշխատանքներն ավարտվել են 2022 թվականին, իսկ 12-րդ փողոցի ասֆալտապատման աշխատանքների մեկնարկն արդեն տրված է։ Ծրագրով նախատեսվում է ասֆալտապատել 500 գծամետր ճանապարհ՝ շուրջ 2500 քառակուսի մետր մակերեսով, շուրջ 140 մետր երկարությամբ կառուցել ջրահեռացման համակարգ։

Երանոս գյուղի Վարդաձորի խճուղու ասֆալտապատման աշխատանքներն իրականացվում են ՀՀ կառավարության կողմից 2023 թվականին իրականացվող սուբվենցիոն ծրագրերի շրջանակներում։ Ծրագրի պայմանագրային արժեքը կազմում է 54 միլիոն 193 հազար դրամ, որի 50 տոկոսը հատկացնում է ՀՀ կառավարությունը, 50 տոկոսը՝ Մարտունու համայնքապետարանը։ Ծրագրով նախատեսվում է Վարդաձորի խճուղու ասֆալտապատում՝ 670 գծամետր երկարությամբ և 3350 քառակուսի մետր ընդհանուր մակերեսով։ Ջրահեռացման համակարգ կկառուցվի շուրջ 100 գծամետր երկարությամբ։

Ճանապարհաշինական աշխատանքները Երանոսում ավարտի կհասցվեն առաջիկա մեկ-երկու ամիսների ընթացքում։