Հնարավոր է շենքի շինարարությունը կանգնի, մարդը չստանա իր բնակարանը․ ի՞նչ կարգավորում է առաջարկվում․ ՏԵՍԱՆՅՈՒԹ

Քանի դեռ գնված բնակարանը շահագործման չի հանձնվել, բնակարանի վկայականը չի տրամադրվել, դրա դիմաց վճարված գումարի 75 տոկոսը պետք է սառեցված լինի: Այս մասին այսօր ԱԺ նիստում նշեց «Քաղաքացիական պայմանագիր» խմբակցության պատգամավոր Գևորգ Պապոյանը «Հայաստանի Հանրապետության քաղաքացիական օրենսգրքում փոփոխություններ կատարելու մասին» օրենքի նախագծի զեկուցման ընթացքում:

«Ստեղծվել է իրավիճակ, երբ ՀՀ քաղաքացիները բնակարաններ են գնում, կառուցապատողներն ու բանկերը պայման են առաջարկում նրանց, որը ռիսկեր է պարունակում: Ենթադրենք՝ նորակառույց շենքի դեռևս 4 հարկն է կառուցված, մարդն 8-րդ հարկում գնում է բնակարանի գնման իրավունք: Տնտեսական ցնցումների, անշարժ գույքի շուկայում գների անկման կամ այլ իրավիճակներում կառուցապատողի ֆինանսական վիճակն էականորեն կարող է վատթարանալ ու շենքի շինարարությունը կանգնել: Կստացվի՝ մարդը գնման իրավունքի գումարը տվել է, բայց շենքը չկա: Օրենսդրական նախաձեռնությունը միտված է նման ռիսկերից խուսափելուն»,- նշեց Գևորգ Պապոյանը:

Պատգամավորը հիմնավորելով, թե ինչով է պայմանավորված իր նշած 75 տոկոսը, նշեց․ «Եթե կառուցապատողի ֆինանսական վիճակը վատթարանա ու այլևս ի վիճակի չլինի շարունակել շինարարությունը, գնման պայմանագիր ունեցողների՝ բանկում 75 տոկոս սառեցված հաշիվների միջոցով շինարարությունն ավարտին հասցնել հնարավոր կլինի»:

Պապոյանը հավելեց, որ վերոնշյալ 75 տոկոսները բանկում ավանդային գումարներ են լինելու, որոնց տոկոսային գումարները կառուցապատողը կկարողանա օգտագործել:

Մանրամասները՝ տեսանյութում։