Հասարակություն
17.05.2023 | 17:33
«Որդիների Կանչ» ՀԿ-ն հայտարարություն է տարածել ՀՀ վարչապետի որդի Աշոտ Փաշինյանին առևանգելու առնչությամբ։
Հայտարարությունը՝ ստորև․
«Լուրեր են տարածվում, թե իբր «Որդիների Կանչ» սոցիալ-հայրենասիրական Հասարակական Կազմակերպության անդամները առևանգել են Աշոտ Փաշինյանին։
Պետք է պարզաբանենք և հստակեցնենք մեկ բան, որ նշված երիտասարդը իր ոտքով-ձեռքով է նստել մեր հերոսամայրերից մեկի մեքենան, այնուհետև մեզ համար անհասկանալի պատճառով իրեն նետել մեքենայից։
Եռաբլուրում, սեպտ. 21-ի գործով հերթական դատական նիստից հետո «Որդիների Կանչ» ՀԿ-ի անդամները դատարանից դուրս գալուց պատահաբար հանդիպել են Աշոտ Փաշինյանին։
Բացառապես մայրերով մոտենալով Ա. Փաշինյանին առաջարկել են նստել իրենց իսկ մեքենան, խոսել և միասին գնալ Եռաբլուր։
Աշոտ Փաշինյանը առանց առարկումների, առանց որևիցե մեկի միջամտության նստել է մայրերից մեկի մեքենան և ճանապարհ ընկել դեպի Եռաբլուր զինվորական պանթեոն։
Այնուհետև ճանապարհին այդպեսել էլ մեզ համար անհասկանալի պատճառով Ա. Փաշինյանը իրեն դեն է նետել ավտոմեքենայից։
Մեքենայի մեջ եղել են միայն տվյալ հերոսածին մայրը և Աշոտ Փաշինյանը։
Մնացած բոլոր տեղեկությունները չեն համապատասխանում իրականությանը և նման ստահոդ տեղեկություններ տարածողներին միայն կասենք 1 բան, որ եթե շարունակվի դեզինֆորմացիայի լայն տարածումը, ապա ստիպված կլինենք տեղադրել տեսանյութ, որտեղ սույն երիտասարդը ինքն է իրենով նստում մեքենան»։
Հիշեցնենք, որ Factor.am-ը ավելի վաղ տեղեկացրել էր, որ ՆԳՆ-ից հաստատում են․ Աշոտ Փաշինյանի ենթադրյալ առևանգման վերաբերյալ հաղորդում է ստացվել։
«Ձեռնարկվում են համապատասխան միջոառումներ, կազմված փաստաթղթերը կուղարկվեն Քննչական կոմիտե» ,- Factor.am -ի հետ զրույցում հայտնել էին ՆԳՆ լրատվության վարչությունից։
