Մի քանի անգամ փորձել եմ, բայց չեմ կարողացել այցելել ԼՂ, ինչո՞ւ․ ԵԽ մարդու իրավունքների հանձնակատար․ ՏԵՍԱՆՅՈՒԹ

ՀՀ ԱԺ փոխխոսնակ Ռուբեն Ռուբինյանը ԵԽԽՎ-ում հարց է ուղղել Եվրոպայի խորհրդի Մարդու իրավունքների հանձնակատար Դունյա Միյատովիչին, թե ե՞րբ է վերջինն այցելելու ԼՂ և Լաչինի միջանցք։ Եվրոպացի պաշտոնյան հայտարարել է, որ մի քանի անգամ փորձել է, սակայն չի կարողացել այցելել Լեռնային Ղարաբաղ։ Վերջինը նաև շեշտել է, որ ինքն անգամ կարողացել է պատերազմող երկիր այցելել, սակայն չի կարողացել այցելել Արցախ, իսկ թե ինչո՞ւ՝ այդ հարցը պետք է ուղղել բոլորին։

«Իմ աշխատանքը, որպես այդպիսին, սահմանները ստուգելը չէ։ Ես փորձել եմ ԼՂ խնդրին նայել մարդու իրավունքների տեսանկյունից, ի վիճակի լինել անել մարդու իրավունքների պաշտպանի գործը։ Եվ մինչ այս պահը ես ի վիճակի չեմ եղել դա անել»,- հայտարարել է Դունյա Միյատովիչը։

Նա հավելել է, որ եռակողմ հայտարարության ստորագրումից անմիջապես հետո ինքը պատրաստ է եղել մեկնել ԼՂ, բայց չի կարողացել։

«Հուշագիր եմ հրապարակել, որում կարևոր կետեր ու հստակ հանձնարարականներ եմ տվել կողմերին՝ ՀՀ-ին և Ադրբեջանին»,- հայտարարել է պաշտոնյան՝ նշելով, որ ոչ մի առաջադրված խնդիր՝ անհետ կորածների, բանտարկվածների, ականազերծման և այլի հետ կապված, երկու տարի անց չի լուծվել։

«Փաստն այն է, որ չեմ կարողանում գնալ։ Ինչո՞ւ։ Ձեր պատճառով է, անդամ երկրների պատճառով է, քանի որ դուք չեք համագործակցում հանձնակատարի հետ, որպեսզի ես հասանելիություն ունենամ։ Եթե ինձանից կախված լիներ, ես կարող եմ հենց հիմա էլ մեկնել»,- հայտարարել է Դունյա Միյատովիչը։

Մանրամասները՝ տեսանյութում:

Տաթև Ֆռանգյան