06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
44-օրյա պատերազմում զոհված զինվորների ծնողները նստացույց են սկսել ՔԿ շենքի դիմաց
Հասարակություն
13.04.2023 | 19:12
44-օրյա պատերազմում զոհված տղաների մի խումբ հարազատներ 24-ժամյա նստացույց են սկսել Քննչական կոմիտեի շենքի դիմաց: Այս մասին Factor.am-ի հետ զրույցում ասաց զոհված Մխիթար Գալեյանի հայրը` Գարիկ Գալեյանը:
Այսօր լրացել է մեկ տարին, երբ Ազգային ժողովի ամբիոնից վարչապետ Նիկոլ Փաշինյանը հայտարարեց` «Կարող էինք կանխել պատերազմը, որի արդյունքում կունենայինք նույն վիճակը, իհարկե, առանց զոհերի»: Այս հայտարարությունից հետո զոհվածների հարազատները բողոքի ակցիաներ էին կազմակերպում՝պնդելով, որ վարչապետն այդ օրը հանցագործության մասին ինքնախոստովանական ցուցմունք է տվել: Նրանք իրավապահներից պահանջում էին պատասխանատվության ենթարկել երկրի ղեկավարին: Նրանք պնդում էին, որ Փաշինյանի հայտարարությունից տպավորություն են ստացել, որ նա նախապես պատկերացնելով, կանխատեսելով պատերազմի հետևանքները, մարդկային կորուստները, դիտավորությամբ չի կանխել այն։
Պատերազմում իրենց որդիներին կորցրած ծնողները հաղորդում էին ներկայացրել Գլխավոր դատախազություն։ Բացի այս հայտարարությունը, զոհվածների ծնողներին ՔԿ-ի շենքի մոտ է բերել նաև Անկախության օրը Եռաբլուրից իրենց բռնի ուժով ոստիկանություն տանելը, որպեսզի վարչապետ Փաշինյանը կարողանար զինվորական պանթեոն այցելել: Ծնողները դժգոհ են հարուցված քրգործից քննության ընթացքից, ասում են` տպավորություն է, թե իրենք են քննում գործը, ոչ թե իրավապահները: Այդ քրգործի շրջանակում հարցաքաննվել են Եռաբլուրից բերման ենթարկված ծնողներն ու առերեսում է եղել ոստիկանների հետ:
Արփի Հակոբյան
