Ուրեմն՝ Նիկոլ Փաշինյանն էլ է թքելուն պատրաստ, թե չէ ՔՊ-ին կասեր` դո՛ւրս շպրտեք ձեր նախագահին ԱԺ-ից․ Արմեն Խաչատրյան․ ՏԵՍԱՆՅՈՒԹ

Factor TV-ի հարցազրույցը ՀԱԿ իրավական հարցերով հանձնաժողովի ներկայացուցիչ Արմեն Խաչատրյանի հետ

-Խորհրդարանի քաղաքական ուժերը թույլ չեն տալիս, որ հասարակությունն առանց սուր զգացողությունների օրեր անցկացնի։ Իհարկե, անվտանգային իրավիճակը Տեղ գյուղում առանց այդ էլ մարդկանց նյարդերը լարում էր, բայց իշխանական և ընդդիմադիր պատգամավորները որոշեցին նոր տեսարաններ, նոր կրքեր ապահովել հանրության համար։ Ինչո՞ւ։

-Ես չէի տարանջատի ԱԺ-ում կատարվածը և Տեղ գյուղում կատարվածն իրարից, որովհետև Տեղ գյուղում կատարվածը հետևանքն է ԱԺ-ում կատարվածի, ընդհանրապես, քաղաքական մեր համակարգում կատարվածի հետևանքն է։ Կհիշենք՝ 5-6 տարի առաջ մենք բողոքում էինք, որ մեր պետական ինստիտուտներն աղճատվում են, դրանք քաղաքական խմբի կողմից օգտագործվում են թալանի կամ իրենց իշխանությունը երկարաձգելու համար, բայց մենք եկանք հասանք մի պահի, երբ այդ ինստիտուտներն ուղղակի զրոյացվում, փոշիացվում են։ Իհարկե՝ Ազգային ժողովում միջադեպեր եղել են, բայց որակի առումով այն, ինչ մենք տեսանք երեկ այդ նիստի ժամանակ, ոչ միայն անթույլատրելի է, այլ ուղղակի աղետ է։ Աղետ, որը պատուհասել է մեր պետությանը։ Նման ոհմակային հարձակում, տգետ, ցինիկ բառապաշար․․․ Անթույլատրելիի սահմանն ամեն օր անցնում ենք։ Նորից եմ ասում՝ ժամանակին կար կարմիր գիծ, որը երբեմն հատվել է՝ հազվադեպ։ Հիմա այդ կարմիր գծերն անընդհատ գնում են հետ և անընդհատ հատվում են։ Ու թե ինչո՞ւ է Տեղ գյուղում մեր սուվերեն տարածքը կորչում, անվտանգային սպառնալիքների մասին կխոսենք դեռ, բայց թե ինչո՞ւ է մեր սուվերեն տարածքն անընդհատ պակասում, ուղիղ հետևանքն է նրա, որ այսօր պետությունը կառավարում է մի ուժ, որն իր խմբային շահի համար պատրաստ է ոտնահարել ԱԺ-ի՝ առանց այն էլ գետնին հավասարեցված շեմը։

-Այդ ուժն ասում է՝ մեզ սադրում ենք, ուղղորդված սադրանքների շարք է։

-Իսկ նախկինում այդ սադրանքներ չե՞ն եղել։ Շատերը նստած նայում են, թե երկրի բարձրագույն օրենսդիր իշխանությունում ինչ է կատարվում, ինչ օրենք են ընդունում, ինչ աշխատանք են անում, ի վերջո՝ մարդու իրավունքների պաշտպանի ընտրությունը մի մեծ հասարակական խմբի՝ իրավապահների, իրավապաշտպանների, անազատության մեջ գտնվող անձանց՝ մեծ խմբի համար շատ հետաքրքիր բան է, կարևոր իրադարձություն է։

-Ապալեգիտիմացվու՞մ է պրոցեսը։

-Չգիտեմ՝ մեզ մոտ արդեն ինչ է մնացել լեգիտիմ՝ սկսած բարձրագույն իշխանությունից մինչև տեղական ինքնակառավարման մարմինների ցածրագույն օղակներ, մեզ մոտ լեգիտիմության պակաս ունեն։

Հարցազրույցն ամբողջությամբ՝ տեսանյութում։

Ռոբերտ Անանյան