Վայրի կենդանիները՝ հայ օլիգարխների խրախճանքի զոհ. ՏԵՍԱՆՅՈՒԹ

Օրերս Էջմիածնից Երևանի կենդանաբանական այգի տեղափոխվեցին գեներալ Մանվել Գրիգորյանին պատկանող  վագրը և գորշ արջերը:  Կենդանիների առողջական վիճակը մասնագետները գնահատում են ոչ բավարար: Վայրի բնության և մշակութային արժեքների պահպանության հիմնադրամի գլխավոր խնդիրն այսօր այդ կենդանիների հետագա ճակատագրի հարցն է: Կենդանաբույժ Հարություն Հովհաննիսյանի գնահատմամբ՝ կենդանիները հյուծված են ու թերսնված։ «Բավական սթրեսային վիճակում են»,- նշեց նա։

Աշխարհի մի շարք երկրներում արգելված է վագրը պահել տնային պայմաններում: Հայաստանում սա որևէ կերպ չի կանոնակարգվում, և ոչ ոք պատասխանատվության չի ենթարկվում: Գաղտնիք չէ, որ Հայաստանում տարբեր մեծահարուստներ ունեն վայրի կենդանիներ, որոնք հաճախ օգտագործվում են որպես խրախճանքի ու ինքնահաստատման առարկա։

Կենդանական աշխարհի մասին ՀՀ օրենքում նշված է՝ որ անազատ և կիսաազատ պայմաններում վայրի կենդանիները պահելու պայմանները պետք է ապահովեն դրանց կենսաբանական, անհատական և տեսակային առանձնահատկությունները, առողջությունը և կյանքի անվտանգությունը: Սակայն մեզանում այդ կենդանիները հիմնականում պահվում են դրանց տերերի՝ բնությունից լիակատար անտեղյակության ու ստորացնող պայմաններում, ինչի հետևանքով էլ բազում հիվանդությունների զոհ են դառնում:

«Փրո փոուզ» կենդանիների բարեկեցության բարեգործական կազմակերպության հայաստանյան ներկայացուցիչ Նարե Արամյանի գնահատմամբ խնդիրը բավական լուրջ է և ժամանակն է այն արմատախիլ անել։

 Անի Մնացականյան