06.06.2026 | 12:34
ՄՔԾ տարածքային ստորաբաժանումները աշխատելու են շաբաթ և կիրակի օրերին
Ադրբեջանի հետ բանակցային գործընթացում միջնորդ չկա. Արարատ Միրզոյան․ ՏԵՍԱՆՅՈՒԹ
Քաղաքականություն
24.03.2023 | 17:20
«Տխուր լուր ունեմ, պարոն Միրզոյան, երկու ամիս է՝ ՀՀ անվտանգության խորհուրդը չի արձագանքում պատգամավորի դիմումին՝ ծանոթանալու համար ՀՀ-Ադրբեջան խաղաղության պայմանագրին։ Հիմա կասեք ես ի՞նչ կապ ունեմ։ Այնքանով, որքանով տևական ժամանակ նախ ԱԳՆ-ում եմ փորձել ծանոթանալ հայկական կողմի առաջարկներին և Ադրբեջանի լրացումներին, բայց մնացել եմ անպատասխան։ Յոթը փակի տակ եք պահում այդ պայմանագիրը։ Հիմա վերջիվերջո կարո՞ղ եք պատասխանել՝ կա՞ մի բան, որի շուրջ հաջողվել է հասնել համաձայնության»,-ԱԺ արտաքին հարաբերությունների հանձնաժողովի նիստում ՀՀ կառավարության ծրագրի կատարման 2022թ․-ի արդյունքների մասին զեկույցի քննարկման ժամանակ այսօր ՀՀ ԱԳ նախարար Արարատ Միրզոյանին հարցրեց «Հայաստան» խմբակցության պատգամավոր Ագնեսա Խամոյանը։
Արարատ Միրզոյանը պատասխանեց․ «Շատ հարցերի շուրջ ոչ իդեալական, բայց փոխընդունելի ձևակերպումներ հաջողվել է գտնել։ Փոխզիջումային տեքստեր ձևակերպվել են։ Ցավոք, սա ոչ հիմնական և ոչ առանցքային հարցերին է վերաբերում։ Առաջնային կարևոր հարցերը քննարկումների փուլում են։ Հիմնական մասի վերաբերյալ կողմերի դիրքորոշումները հեռու են իրարից»։
Ագնեսա Խամոյանը նաև հարցրեց՝ խաղաղության պայմանագրի ո՞ր տարբերակն է քննարկվում՝ արևմտյան, թե ռուսական։ Արարատ Միրզոյանը պատասխանեց․ «Միջնորդություն չկա, բանակցությունները համարվում են երկկողմ՝ որևէ երրորդ երկրի կազմակերպմամբ։ Մենք մանրամասներին տեղեկացնում ենք ԵԱՀԿ երկրներին։ Արևմուտքի տարբերակ չկա։ Ընթացքում եղել է ռուսական տարբերակ, որին համաձայնել ենք, Ադրբեջանը՝ ոչ։ Մնացածը հայ-ադրբեջանական տարբերակ է։ Հավաքական արևմուտքը մեզ տարբերակ չի առաջարկել։ Կրկին հրավիրում եմ ձեզ ԱԳՆ, որովհետև խնդիր չեմ տեսնում։ Մտավախությունս այն է, որ վաղաժամ կամ սխալ պատկերացում կարող եք ունենալ այս կամ այն մտքի դեպքում։ Բայց ընդհանուր գծերի մասին կարող եք ծանոթանալ»։
Մանրամասները՝ տեսանյութում:
