Ալիևի վերջին շանսն է՝ ՀՀ-ի դեմ ագրեսիայի․ Էրդողանի հեռացմամբ Ադրբեջանը կկորցնի մեծ հենարան․ Նելլի Մինասյան․ ՏԵՍԱՆՅՈՒԹ

Մայիսի 14-ին նշանակված Թուրքիայի նախագահական ընտրություններից առաջ թուրքական ընդդիմությունը փորձում է լիարժեք կոնսոլիդացիա ապահովել։ Ընդդիմության միասնական թեկնածուն՝ Ժողովրդահանրապետական կուսակցության առաջնորդ Քեմալ Քըլըչդարօղլուն այսօր հանդիպել է քրդական փոքրամասնության շահերը ներկայացնող Ժողովուրդների դեմոկրատական կուսակցության համանախագահներ Փերվին Բուլդանի և Միթհատ Սանջարի հետ։ Ի՞նչ վիճակ է Թուրքիայում ընտրություններից 2 ամիս առաջ, և կհաջողվի՞ քրդերի ձայները կոնսոլիդացնել ընդդիմության շուրջ։

Թուրքագետ Նելլի Մինասյանը Factor TV-ին տված հարցազրույցում շատ հավանական է համարում, որ քրդերն աջակցեն Թուրքիայի ընդդիմությանը։

«Մայիսի 14-ին նախատեսված են ոչ միայն նախագահական, այլև խորհրդարանական ընտրություններ։ Երբ ընդդիմության մեծ դաշինքը հայտնի դարձավ, քրդական ուժերը հայտարարեցին, որ իրենք պատրաստ են սկսել երկխոսություն, և նմանատիպ մեսիջներ եղան նաև ընդդիմության կողմից։ Քրդական ուժի առաջնորդ Դեմիրթաշը, որ բանտում է գտնվում, նամակ ուղղեց Աքշեներին՝ ընդդիմադիր ուժերից մեկի առաջնորդին, ինչից հետո կանխատեսելի էր, որ կողմերը կգնան համաձայնության։ Եվ, փաստորեն, այսօր Քըլըչդարօղլուն հանդիպում է քրդամետ ուժի ղեկավարների հետ։ Էրդողանի ուժը ևս այսպիսի գործընթացի մեջ է՝ փնտրում է համախոհներ, ինչը սպասելի էր։ Կարելի է սպասել, որ քրդական փոքրամասնության շահերը ներկայացնող Ժողովուրդների դեմոկրատական կուսակցությունը կաջակցի ընդդիմադիր Ժողովրդահանրապետականների առաջնորդ Քեմալ Քըլըչդարօղլուին՝ որպես ընդդիմության թեկնածու նախագահի պաշտոնում»,- նշեց նա։

Թուրքիայում անցկացված վերջին սոցհարցումների համաձայն՝ քրդական կուսակցության վարկանիշը տատանվում է 10-ից 12 տոկոսի միջակայքում, ինչը, ըստ թուրքագետի, կարող է վճռական լինել նախագահական ընտրություններում՝ ի վնաս Էրդողանի։

Հարցազրույցն ամբողջությամբ՝ տեսանյութում։

Ռոբերտ Անանյան