Դատախազությունը կհետևի, որ Վահրամ Բաղդասարյանի հարկային արտոնություն ստացած ընկերությունը սնանկ չճանաչվի և յուրացնի պետբյուջի գումարները․ ՏԵՍԱՆՅՈՒԹ

Կառավարության այսօրվա նիստում գործադիրը հավանություն տվեց «ՎԱԲԱ» ՍՊ ընկերությանը հարկային արտոնություն տալու մասին որոշման նախագծին։ Նշենք, որ  ընկերությունը ցանկանում է ներդնել հակակարկտային ցանցերի և կարկտապաշտպան ցանցերի արտադրություն: 

Հարցի զեկուցող ՀՀ տնտեսական զարգացման և ներդրումների նախարար Արծվիկ Մինասյանի խոսքով՝ գյուղատնտեսության ոլորտում հակակարկտային ցանցերի արտադրության համար այս ներդրումային ծրագրով նախատեսվում է իրականացնել  2 մլրդ-ից ավելի գումարի ներդրում  և Հայաստանում առաջին անգամ է, որ կազմակերպվում է հակակարկտային ցանցերի արտադրություն։

Վարչապետը նախարարից հետաքրքրվեց՝ արդյոք  այս որոշմամբ նպաստո՞ւմ ենք, որ հակակարկտային ցանցերի գները նվազեն։

Հարցին ի պատասխան՝ Արծվիկ Մինասյանը նշեց, որ ակնկալում են, որ գների նվազում տեղի կունենա և այս ընկերությունը  դաշտ կբերի նոր նմանատիպ կազմակերպությունների։ 

ՀՀ գլխավոր դատախազ Արթուր Դավթյանն էլ նշեց, որ ունեցել ենք նման հարկային արտոնություններ ստացած ընկերություններ, որոնք հետագայում ճանաչվել են սնանկ, ուստի այստեղ անհրաժեշտություն կա մշակել մեխանիզմ, որպեսզի պետությանը վնաս չպատճառվի։ 

Դատախազը նշեց, որ այս պահին կա տեղեկություն, որ 8 ընկերություն ստացել է հարկային արտոնություն, որից հետո սկսվել է սնանկացման գործընթաց։ 

Նշենք, որ Վանաձորում գործող «ՎԱԲԱ» ընկերության 100 տոկոս բաժնետերն է ԱԺ ՀՀԿ խմբակցության ղեկավար Վահրամ Բաղդասարյանը։

Նախագիծն ընդունվեց։

Մանրամասները՝ տեսանյութում։