30.04.2024 | 20:43
Սաուդյան Արաբիայի արքայազնն ընդունել է Հայաստան այցելելու հրավերը
Վարչապետը դեռ չի հաստատել Մանե Թանդիլյանի դիմումը․ նախարարն անորոշ վիճակում գնում է աշխատանքի
Քաղաքականություն
20.06.2018 | 13:29
Աշխատանքի և սոցիալական հարցերի նախարար Մանե Թանդիլյանը պաշտոնը ստանձնելուց կարճ ժամանակ անց՝ հունիսի 12-ին, ներկայացրեց հրաժարականի դիմում։
Չնայած Թանդիլյանը հայտնել էր, որ այլևս չի պատրաստվում աշխատել որպես նախարար, այնուամենայնիվ, հունիսի 12-ին հաջորդող օրերին Կառավարության նիստերին նա ներկա էր։
Արդյոք Մանե Թանդիլյանի հրաժարականի դիմումն ընդունվել է, թե նա մտքափոխվել է և որոշել շարունակել պաշտոնավորումը։ Այս հարցը ճշտելու նպատակով Factor.am-ը դիմեց նախարարի մամուլի խոսնակ Մանե Մադոյանին, ով մեզ հետ զրույցում նշեց, որ աշխատանքի եւ սոցիալական հարցերի նախարար Մանե Թանդիլյանը շարունակում է կատարել իր աշխատանքային պարտականությունները նույն գրաֆիկով, ինչպես մինչ հրաժարականի դիմում ներկայացնելը․ «Նախարարի համար ևս անորոշ է, մինչ օրս նա շարունակում է աշխատել, երկրորդ անգամ չի ներկայացրել հրաժարականի դիմում, իսկ արդյոք առաջին անգամ ներկայացրած դիմումը Կառավարության ղեկավարը հաստատել, թե մերժել է, այս պահին չեմ կարող ասել, նման տեղեկություն չունեմ, այդ հարցն անորոշ է»,- նշեց խոսնակը։
Հարցին՝ արդյոք անցած օրերի ընթացքում նախարարը փորձել է այս հարցով խոսել վարչապետ Նիկոլ Փաշինյանի հետ՝ Թանդիլյանի խոսնակը պատասխանեց․ «Իհարկե՛, խոսել են, կարծում եմ՝ համաձայնության են եկել, որ դեռ պետք է սպասել»։
Թե ինչու նախարարի հրաժարականի դիմումից 8 օր անց վարչապետն այն դեռ չի հաստատել կամ մերժել, այս հարցում Կառավարության տեսակետն ու սահմանված ընթացակարգը ինչպիսին է, կներկայացնենք ավելի ուշ։
