05.01.2025 | 21:53
Մատուցվեց Սուրբ ծննդյան ճրագալույցի պատարագ․ ԼՈՒՍԱՆԿԱՐՆԵՐ
Թուրքիայի ընդդիմադիր դաշինքը փետրվարի 13-ին կհայտարարի նախագահի միասնական թեկնածուի անունը
Քաղաքականություն
30.01.2023 | 22:36
Թուրքիայի գլխավոր ընդդիմադիր Ժողովրդահանրապետական կուսակցության ղեկավար Քեմալ Քըլըչդարօղլուն հայտնել է, որ վեց կուսակցությունների դաշինքը փետրվարի 13-ին կհայտարարի նախագահի միասնական թեկնածուին, գրում է Gercek news-ը։
Միասնական թեկնածուի անունը կորոշեն ընդդիմադիր դաշինքը կազմող վեց քաղաքական կուսակցությունների առաջնորդները, հայտարարել է Քըլըչդարօղլուն Halk TV-ի ուղիղ եթերում։
«Ամեն կուսակցություն բնական է ցանկանում է տեսնել իր առաջնորդին, որպես նախագահական թեկնածու։ CHP-ի անդամները նույնպես ցանկանում են տեսնել իրենց առաջնորդին որպես նախագահի թեկնածու: Բայց այստեղ գլխավորն այն է, որ վեց առաջնորդները համատեղ որոշում կայացնեն»,- ասել է նա։
Թուրքիայի վեց ընդդիմադիր կուսակցությունները, որոնք միավորվել են Թուրքիայում խորհրդարանական համակարգը վերականգնելու համար, աշխատում են միասնական թեկնածու առաջադրել նախագահ Ռեջեփ Թայիփ Էրդողանի դեմ նախագահական մրցավազքում։ Ընտրություններն, ամենայն հավանականությամբ, կանցկացվեն մայիսի 14-ին:
Ընդդիմադիր դաշինքն ընդգրկում է Ժողովրդահանրապետական կուսակցությունը (CHP), İYİ (Լավ) կուսակցությունը, Ուրախություն (Saadet) կուսակցությունը, Դեմոկրատական կուսակցությունը, DEVA (Ժողովրդավարություն և առաջադիմություն) կուսակցությունը և Ապագա (Gelecek) կուսակցությունը:
Մեկնաբանելով նաև քրդամետ Ժողովուրդների դեմոկրատական կուսակցության փակման գործը՝ Քըլըչդարօղլուն ասել է, որ CHP-ն դեմ է ցանկացած կուսակցության փակմանը։ Նա նաև նշել է, որ քրդամետ կուսակցության, նախկին համանախագահ Սելահաթթին Դեմիրթաշը անարդարացիորեն է բանտարկվել։ Քըլըչդարօղլուն կոչ է արել HDP-ին միասին աշխատել նախագահական ընտրությունների համար։ Հավելենք, որ քրդամետ կուսակցությունը առանձին թեկնածուով է մասնակցելու ընտրություններին։
Էմմա Չոբանյան
