Ռուսաստանը Սերժ Սարգսյանի դեմ օգտագործելու կոմպրոմատներ շատ ուներ, հիմա ուզում են հասկանալ՝ Նիկոլ Փաշինյանի հետ ո՞նց աշխատեն. Ստեփան Գրիգորյան. ՏԵՍԱՆՅՈՒԹ

Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանի կարծիքով՝ վարչապետ Նիկոլ Փաշինյանը ճիշտ է վարվում ՌԴ նախագահ Վլադիմիր Պուտինի հետ հանդիպումներին առիթներն օգտագործելով: «Դա կլինի երաշխիք, որ Ռուսաստանը հանգիստ կվերաբերի այն փոփոխություններին, որոնք տեղի են ունենում Հայաստանում, քանի որ Ռուսաստանն ուշադիր հետևում է: Համոզված եմ՝ հիմա էլ իրենք մտահոգված են, նայում են՝ ինչ է կատարվում»,- նշեց քաղաքագետը:

Ըստ Ստեփան Գրիգորյանի՝ Ռուսաստանը Հայաստանի հետ մասամբ աշխատում է կոռուպցիոներների և հանցագործների միջոցով, ուստի այժմ կորցնելով այդ լծակները՝ ուզում է հասկանալ՝ որ լծակներն օգտագործի: «Օրինակ, Սերժ Սարգսյանի դեմ կոմպրոմատները շատ էին, և իրենք այդ լծակներն օգտագործում էին, ստիպում էին, հիմա ուզում են հասկանալ՝ Նիկոլ Փաշինյանի հետ ո՞նց աշխատեն: Նիկոլ Փաշինյանն էլ ասում է՝ ես բաց եմ, ես ձեզ հետ հավասարը հավասարի հետ պատրաստ եմ գործընկերային հարաբերություններ ձևավորել՝ առանց քաղաքական գեոպոլիտիկ խաղերի»,- շարունակեց քաղաքագետը:

Վարչապետ ընտրվելուց հետո Նիկոլ Փաշինյանը դեռևս որևէ այց չի կատարել Բրյուսել, քաղաքագետը  դրանում որևէ արտառոց բան չի տեսնում, ավելին` համոզված է, որ վարչապետն առաջիկայում կայցելի Բրյուսել: «Բրյուսելին ինքը հանգիստ կբացատրի, և նրանք դա հանգիստ կընդունեն»,- համոզմունք հայտնեց Գրիգորյանը:

Քաղաքագետն անդրադարձավ նաև այն փաստին, որ Փաշինյան-Պուտին և Պուտին- Ալիև հանդիպումների ընթացքում անդրադարձ չի կատարվել ղարաբաղյան հակամարտությանը, ամեն դեպքում այդ մասին տեղեկատվություն չկա կողմերի տարածած պաշտոնական հաղորդագրություններում: «Ես չեմ բացառում , որ ղարաբաղյան հակամարտության մասին խոսվել է, սակայն կողմերը պայմանավորվել են այդ մասին պաշտոնապես չհայտարարեն: Կարծում եմ՝ դա կարող է կապված լինել նրա հետ, որ Ռուսաստանը համաձայն է Հայաստանի դիրքորոշման հետ այն առումով, որ տեղին չէ երկու երկրների ղեկավարների հանդիպումը քանի դեռ Հայաստանում իշխանափոխությունն ավարտված չէ»,- հավելեց քաղաքագետը:

Հարցազրույցն ամբողջությամբ՝ տեսանյութում:

Շողիկ Գալստյան