Ի՞նչ եք անում Լաչինի միջանցքի բացման համար․Կարո Փայլանը՝ Չավուշօղլուին

Թուրքիայի խորհրդարանի քրդամետ Ժողովուրդների դեմոկրատական կուսակցության հայ պատգամավոր Կարո Փայլանը Լաչինի միջանցքի փակման վերաբերյալ հարց է ուղղել ԱԳ նախարար Մևլութ Չավուշօղլուին, գրում են թուրքական լրատվամիջոցները։

Փայլանը հարցուպատասխանի ժամանակ նշել է, որ Լաչինի միջանցքն արդեն մեկ ամսից ավելի է՝ փակ է իրենց «բնապահպան ակտիվիստներ» անվանող ադրբեջանցիների խմբի և Ադրբեջանի անվտանգության ուժերի կողմից։

«Լաչինի միջանցքի փակման պատճառով Լեռնային Ղարաբաղում ամեն օր աճում է պարենային և դեղորայքային ճգնաժամը։ Լեռնային Ղարաբաղի 120,000 հայեր ձմեռային ծանր պայմաններում բախվում են հումանիտար մեծ ճգնաժամի՝ բնական գազի և էլեկտրաէներգիայի անջատումների պատճառով»,- ասել է Փայլանը։

Նա Չավուշօղլուին ուղղել է հետևյալ հարցերը․ «Ի՞նչ եք անում Լեռնային Ղարաբաղում խորացող հումանիտար ճգնաժամի լուծման համար։ Ի՞նչ դիվանագիտական նախաձեռնություններ եք ձեռնարկել Լաչինի միջանցքի բացման համար, որը կապում է Լեռնային Ղարաբաղը Հայաստանին: Տեղյա՞կ եք, որ Լաչինի միջանցքի արգելափակումը փակում է տարածաշրջանում խաղաղության հաստատման հնարավորության պատուհանը: Ինչո՞ւ Թուրքիան, որը պարծենում է, թե աշխարհում շատ հումանիտար ճգնաժամերի է միջամտում, աչքը չի թարթում ԼՂ-ի 120,000 հայերի համար»։

Թուրքական լրատվամիջոցները չեն հայտնում, թե ինչպես է այս հարցերին արձագանքել Չավուշօղլուն։

Հավելենք, որ ավելի վաղ Փայլանը սոցցանցի իր էջերում էր անդրադարձել Ադրբեջանի կողմից Լաչինի փակմանը։ Նա կոչ էր արել Թուրքիայի իշխանություններին ու նախագահ Ռեջեփ Թայիփ Էրդողանին պատասխանատվություն ստանձնել Արցախի շրջափակման դադարեցման համար։

Էմմա Չոբանյան