04.06.2026 | 14:03
Իսրայելի պաշտպանության նախարարը հայտարարել է Լիբանանում գործողությունները շարունակելու մասին՝ չնայած հրադադարի համաձայնագրին
Կոչ եմ անում նախագահ Էրդողանին պատասխանատվություն ստանձնել ԼՂ-ի շրջափակման դադարեցման համար․ Կարո Փայլան
Քաղաքականություն
29.12.2022 | 14:04
Թուրքիայի խորհրդարանի հայազգի պատգամավոր Կարո Փայլանն անդրադարձել է Ադրբեջանի իշխանությունների կողմից Արցախի շրջափակմանը։ Նա թվիթերյան իր էջում գրել է, որ Լեռնային Ղարաբաղը Հայաստանին կապող միակ ճանապարհը՝ Լաչինի միջանցքը, ավելի քան երկու շաբաթ է՝ փակվել է որպես «բնապահպան ակտիվիստներ» ներկայացող ադրբեջանական խմբի և անվտանգության ուժերի կողմից։
«Լաչինի միջանցքի փակման պատճառով Լեռնային Ղարաբաղում օրեցօր աճում է տարրական կարիքների՝ սննդի և դեղորայքի հասանելիության ճգնաժամը։ Լեռնային Ղարաբաղի 120.000 հայերը հայտնվել են թակարդում։ Մարդասիրական ճգնաժամի վերածված այս շրջափակմանը պետք է հնարավորինս շուտ վերջ դրվի»,- գրել է Փայլանը։
Նա նաև դիմել է Թուրքիայի իշխանություններին․ «Թուրքիան չպետք է անտարբեր մնա Լեռնային Ղարաբաղում աճող հումանիտար ճգնաժամի հանդեպ։ Քաղաքական կառույցները պետք է անհապաղ քայլեր ձեռնարկեն։ Ես կոչ եմ անում նախագահ Էրդողանին՝ պատասխանատվություն ստանձնել Լեռնային Ղարաբաղի շրջափակման դադարեցման համար։ Կովկասում խաղաղության հաստատումը բխում է նաև Թուրքիայի շահերից։ Եթե մենք բոլորս պատասխանատվություն ստանձնենք Լեռնային Ղարաբաղում հումանիտար ճգնաժամի ավարտի համար, մենք կարող ենք վերադառնալ դրական օրակարգին և՛ Ադրբեջան-Հայաստան, և՛ Թուրքիա-Հայաստան կարգավորման գործընթացում»։
Հավելենք, որ արդեն 18-րդ օրն է՝ Ադրբեջանը փակ է պահում Լաչինի միջանցքը, որի հետևանքով Արցախում հումանիտար ճգնաժամ է։
Էմմա Չոբանյան
