02.05.2024 | 15:29
Աղստև գետը եթե խոսել իմանար, կպատմեր՝ Քոչարյանի ժամանակ ինչքան քվեաթերթիկ է լցվել մեջը․ Ալեքսանյան․ ՏԵՍԱՆՅՈՒԹ
Ալիևը դժգոհել է, որ ԵՄ-ն նոր առաքելություն է ուղարկում Հայաստան
Քաղաքականություն
11.01.2023 | 12:15
Ադրբեջանի նախագահ Իլհամ Ալիևը Հայաստան ԵՄ քաղաքացիական նոր առաքելության ուղարկումը առանց Բաքվի հետ համաձայնեցնելու «խաբերություն» է որակել՝ նշելով, որ դա կարող է բացասական ազդել Եվրամիության հովանու ներքո ընթացքող հայ-ադրբեջանական բանակցությունների վրա։
Տեղական քարոզչական հեռուստաընկերությունների հետ հարցազրույցում Ալիևն ասել է, որ Հայաստան ԵՄ 40 հոգանոց առաքելության ուղարկումը երկու ամսով համաձայնեցվել է 2022 թ-ի հոկտեմբերի 6-ին Պրահայում կայացած Հայաստանի, Ադրբեջանի, Ֆրանսիայի ու Եվրոպական խորհրդի ղեկավարների քառակողմ հանդիպմանը։ Ալիևի խոսքով՝ ավելի ուշ ԵՄ-ն,իբր, խախտել է ձեռք բերված պայմանավորվածությունները՝ դեկտեմբերի 19-ին նախորդի մանդատի ավարտից հետո առանց Բաքվի հետ համաձայնության նոր առաքելություն ուղարկելու որոշում կայացնելով։
«Ինչ-որ պատճառով պայմանավորվածությունը խախտվել է, ինչը, իհարկե, չափազանց հիասթափեցնող է, քանի որ մենք լուրջ մարդիկ ենք… Եթե ինչ-որ բանի շուրջ պայմանավորվել ենք, թեկուզ բանավոր, ապա պայմանավորվածությունները պետք է պահպանվեն»,-դժգոհել է Ադրբեջանի նախագահը։
Նա նշել է, որ առաքելության ներկայացուցիչներն արդեն Հայաստանում են և հանդիպումներ են ունենում, և, ըստ առկա տեղեկությունների, փետրվարին ԵՄ առաքելությունը արդեն մեծ կազմով Հայաստան կուղարկվի առանց Բաքվի հետ համաձայնության։ Ալիևը նաև հայտարարել է, որ Բաքուն ԱՄՆ-ն և Ռուսաստանն է դիտարկում որպես Հայաստանի հետ բանակցությունների հարթակներ։ Ըստ նրա ԵՄ-ն կարող է նման հարթակ լինել,«եթե իրեն ազնիվ պահի»։
Էմմա Չոբանյան
