16.12.2025 | 14:02
ԿԲ նախագահ Մարտին Գալստյանի ասուլիսը. ՈՒՂԻՂ
ԱՄՆ-ն անհանգստացած է Ստամբուլի ընդդիմադիր քաղաքապետի ազատազրկման վճռի կապակցությամբ
Քաղաքականություն
15.12.2022 | 22:38
ԱՄՆ Պետքարտուղարությունը «խորապես անհանգստացած է ու հիասթափված» Ստամբուլի քաղաքապետ Էքրեմ Իմամօղլուին ազատազրկման դատապարտելու՝ թուրքական դատարանի որոշման կապակցությամբ։ Այս մասին հայտարարել է Պետքարտուղարության փոխխոսնակ Վեդանտ Պատելը, գրում է Reuters-ը։
«Այս անարդար դատավճիռը հակասում է մարդու իրավունքների հարգման, հիմնարար ազատություններին և օրենքի գերակայության սկզբունքներին: Մենք մնում ենք խիստ անհանգստացած Թուրքիայում քաղաքացիական հասարակության, ԶԼՄ-ների, քաղաքական և բիզնես առաջնորդների նկատմամբ շարունակվող մեղադրանքների և նրանց երկարատև նախնական կալանքի որոշումների կապակցությամբ»,- ասել է Պատելը։
Հիշեցնենք, որ նախօրեին դատարանը Ստամբուլի ընդդիմադիր քաղաքապետ Էքրեմ Իմամօղլուին դատապարտել էր 2 տարի 7 ամիս ժամկետով ազատազրկման՝ իբրև Կենտրոնական ընտրական հանձնաժողովի ներկայացուցիչներին վիրավորելու համար ու արգելել զբաղվել քաղաքական գործունեությամբ։ Եթե Իմամօղլուի դատավճիռը հաստատվի բարձրագույն մարմնի կողմից, նա կարող է զրկվել իր պաշտոնից՝ քաղաքական գործունեություն ծավալելու հնգամյա արգելքի պատճառով։
Հավելենք, որ 2023 թվականին Թուրքիայում կայանալիք նախագահական ընտրություններում Իմամօղլուն գործող նախագահ Ռեջեփ Թայիփ Էրդողանի հիմնական մրցակիցներից է համարվում։ Տարբեր սոցհարցումների համաձայն՝ նա գերազանցում է Էրդողանին և ունի ընտրություններում հաղթելու լրջագույն հնարավորություն։ Այսպիսով, Էրդողանն իր ճանապարհն ազատում է լրջագույն մրցակցից։
Էմմա Չոբանյան
