Էրդողանը հայտարարել է, որ անհրաժեշտ է սկսել աշխատել արևմտյան շուկաներ թուրքմենական գազի մատակարարման ուղղությամբ

Թուրքիան հատուկ կարևորություն է տալիս թյուրքալեզու երկրների հետ հարաբերությունների զարգացմանը, այդ թվում՝ Թյուրքական պետությունների կազմակերպության հարթակի միջոցով։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Թուրքիա-Թուրքմենստան-Ադրբեջան եռակողմ գագաթնաժողովում ունեցած ելույթում, գրում է Անադոլու գործակալությունը։

Էրդողանը նշել է, որ Թուրքմենստանի արագ ու ամբողջական անդամակցությունը Թյուրքական պետությունների կազմակերպությանը նոր խթան կլինի կառույցի համար։

«Համոզված եմ, որ Անկարայի, Բաքվի և Աշխաբադի եղբայրական կապերը կամրապնդվեն մեր երկրների ռազմավարական հնարավորությունների հիման վրա։ Մեր նպատակն է՝ առավելագույնս օգտագործել գլոբալ ու տարածաշրջանային գործընթացները ի շահ բնակչության՝ թիրախում ունենալով տարածաշրջանային կայունությունը»,- ասել է Թուրքիայի նախագահը։

Նա նշել է, որ պետությունների փոխգործակցությունը հատկապես կարևոր է ժամանակակից մարտահրավերների և ճգնաժամերի ֆոնին։ Ըստ Թուրքիայի ղեկավարի՝ ռուս-ուկրաինական պատերազմը ցնցել է պարենային և էներգետիկ անվտանգությունն աշխարհում, և Ուկրաինայում տեղի ունեցողի հետևանքներն այս կամ այն ​​կերպ զգում են բոլոր երկրները, այդ թվում՝ գնաճի տեսքով։ Նա նաև խոսել է Թուրքիայի ջանքերի մասին այդ հարցում։

Էրդողանը նաև անդրադարձել է էներգետիկ ոլորտում համագործակցությանը՝ ասելով, որ անհրաժեշտ է սկսել աշխատել արևմտյան շուկաներ թուրքմենական գազի մատակարարման ուղղությամբ։ Նա նշել է, որ Թուրքիան պատրաստ է համագործակցել նաև Թուրքմենստանի և Ադրբեջանի հետ Կասպից ծովում գտնվող «Դոստլուգ» նավթագազային հանքավայրի շահագործման հարցում։ Բացի այդ, Անկարան պատրաստ է Թուրքմենստանի ու Ադրբեջանի հետ քննարկել Թուրքիա էլեկտրաէներգիայի ներկրման հարցը։

Էմմա Չոբանյան