30.10.2026 | 13:10
Միշտ ցածր գնահատող տաքսու ուղևորների գնահատականները հաշվի չեն առնվի․ ՏԵՍԱՆՅՈՒԹ
Նախիջևանցի պաշտոնյաները տարվել են Բաքու՝ հարցաքննության
Քաղաքականություն
09.12.2022 | 16:10
Նախիջևանի կապի և նոր տեխնոլոգիաների նախարար Վուսալ Սևդիմալիևը և Նախիջևանի Ինքնավար Հանրապետության Ձեռնարկատերերի համադաշնության խորհրդի նախագահ, Cahan Holding ընկերությունների միության նախագահ Վուգար Աբասովը տարվել են Բաքու՝ հարցաքննության, գրում են ադրբեջանական լրատվամիջոցները։
Նշվում է, որ նրանց կասկածում են հարկերից խուսափելու, մաքսանենգության և այլ հանցագործությունների մեջ։ Հարցաքննությունից հետո նրանց վերադարձրել են Նախիջևան՝ հետագա ստուգումների համար։
Հիշեցնենք, որ Բաքվի կողմից Նախիջևանի ինքնավար մարզի վրա ճնշումները վերջին շրջանում ուժեղացել են։ Նախագահ Իլհամ Ալիևի հրամանագրով վերացվել է Նախիջևանի Ինքնավար Հանրապետության պետական մաքսային կոմիտեն։ Փոխարենը Մաքսային պետական կոմիտեի կազմում կգործի Նախիջևանի գլխավոր մաքսային վարչությունը։
Հավելենք, որ վերջերս լուծարվել է նաև Նախիջևանի Ինքնավար Հանրապետության Պետական անվտանգության ծառայությունը, դրա հիմքի վրա ստեղծվել է Ադրբեջանի ՊԱԾ Նախիջևանի գլխավոր վարչությունը, որի ղեկավար է նշանակվել գնդապետ Մոհսուն Աշուրովը։
Նախիջևանի կառույցներն Ադրբեջանի կենտրոնական իշխանություններին ենթարկեցնելու՝ Ալիևի քայլերը բուռն քննարկումներ են առաջացրել երկրում։ Համեմատաբար անկախ և ընդդիմադիր տարբեր լրատվամիջոցներ էլ տեղեկություններ են տարածում, թե Նախիջևանի բոլոր գերատեսչությունները սկսելու են ենթարկեցնել Բաքվի կենտրոնական գերատեսչություններին։ Համացանցում նաև ակտիվորեն խոսվում է Նախիջևանի ինքնավար կարգավիճակի վերացման մասին։
Տաթև Ֆռանգյան
