Թուրքիայում քրդամետ կուսակցության պատգամավորին թույլ չեն տվել խորհրդարանում քրդերեն ելույթ ունենալ

Թուրքիայի գլխավոր ընդդիմադիր Ժողովրդահանրապետական կուսակցությունից (CHP) խորհրդարանի փոխնախագահ Հայդար Աքարը դեկտեմբերի 6-ին թույլ չի տվել քրդամետ Ժողովուրդների դեմոկրատական կուսակցության (HDP) պատգամավոր Իմամ Թաշչըերին նիստում քրդերեն ելույթ ունենալ, գրում է Duvar-ը։

2023 թվականի բյուջեի հարցով քննարկումների ժամանակ Թաշչըերը ցանկացել է ամբողջ ելույթը քրդերեն ներկայացնել։ Որոշ ժամանակ դա թույլ տալուց հետո՝ խորհրդարանի փոխնախագահ Հայդար Աքարը խնդրել է Թաշչըերին ելույթը թուրքերեն շարունակել։ Երբ Թաշչըերը ցանկացել է շարունակել խոսել քրդերեն, Աքարն անջատել է խոսափողը և թույլ չի տվել պատգամավորին խոսել՝ «կանոնակարգի համաձայն»։

«Ես ևս մայրենի լեզու ունեմ (թուրքերենից տարբեր): Այստեղ ոչ մի պատգամավոր չի կարող ինձ հասկանալ, երբ ես խոսում եմ իմ մայրենի լեզվով։ Ես շարունակում եմ խոսել թուրքերեն, որը երկրի պաշտոնական լեզուն է, որպեսզի բոլորս հասկանանք: Նա կարող է մի քանի նախադասություն (քրդերեն) ասել, բայց չի կարող ամբողջ ելույթն ասել քրդերեն»,- ասել է Աքարը։

Առարկելով որոշման դեմ՝ HDP խմբի փոխնախագահ Մերալ Դանիշ Բեշթաշն ասել է․ «Այստեղ հարյուրավոր քրդախոս պատգամավորներ կան։ Վեհաժողովի չորս հինգերորդը կարող է չհասկանալ, բայց ես պնդում եմ, որ մեկ հինգերորդը հասկանում է: Սա Թուրքիայում բնակվող ավելի քան 30 միլիոն քրդերի լեզուն է։ Քրդերը Թուրքիայի Հանրապետության քաղաքացիներ չե՞ն, հարկեր չե՞ն վճարում»։

Նա հավելել է, որ կանոնակարգը չի նշում, որ քրդերեն խոսել չի կարելի։

«Ես դեմ չեմ քրդերենին։ Նա կարող է ինչ-որ բան ասել իր մայրենի լեզվով։ Եթե նա թարգմանի դրանք, մենք կարող ենք հասկանալ դիտողությունները։ Ասում եք, որ 30 միլիոն քուրդ դա հասկանում է, իսկ մնացած 50 միլիոնը չի հասկանում: Նպատակն է, որ 86 միլիոն մարդ հասկանա»,- ի պատասխան՝ ասել է Աքարը։

Էմմա Չոբանյան