30.10.2026 | 13:10
Միշտ ցածր գնահատող տաքսու ուղևորների գնահատականները հաշվի չեն առնվի․ ՏԵՍԱՆՅՈՒԹ
Ադրբեջանցի լրագրողները փորձել են ներխուժել Արցախի տարածք․ ռուս խաղաղապահները թույլ չեն տվել
Քաղաքականություն
07.12.2022 | 14:43
Ադրբեջանի պսևդոէկոլոգների խումբն Արցախում է՝ ռուս խաղաղապահների հետ բանակցությունների։ Նրանց ուղեկցում են ադրբեջանական պետական ու քարոզչական լրատվամիջոցների ներկայացուցիչները, որոնք տարբեր սադրանքներ են փորձում իրականացնել տեղում, այդ թվում՝ մուտք գործել Արցախի տարածք։
Ադրբեջանական լրատվականների կողմից հրապարակված տեանյութերում երևում է, որ Բաքուն հիմա էլ լրագրողների միջոցով է փորձում սադրանք կազմակերպել։ Նախ՝ լրագրողները փորձել են մուտք գործել Իվանյան համայնքում ռուս խաղաղապահների տեղակայման վայր, որտեղ ընթացել են բանակցությունները։ Ի պատասխան՝ ռուս խաղաղապահ զորախմբի հրամանատար Անդրեյ Վոլկովը հայտարարել է, որ տեսախցիկների ու լրագրողների մուտքն արգելված է։
«Ես ամեն ինչ կարդում և տեսնում եմ, դա խտրականություն է»,- ասել է Վոլկովը լրագրողներին՝ նկատի ունենալով ադրբեջանական մամուլում իր ու ռուս խաղաղապահների գործունեությունը քննադատող հրապարակումները։
Բացի այդ, ադրբեջանցի լրագրողները փորձել են նաև ներխուժել Արցախի տարածք։ Նրանք, մասնավորապես, ոտքով հատել են խաղաղապահների անցակետն ու փորձել գնալ Ստեփանակերտի ուղղությամբ, սակայն ռուս խաղաղապահները լրացուցիչ ուժեր են գործի դրել, փակել են ճանապարհն ու լրագրողներին հետ դարձրել։
Էմմա Չոբանյան
