18.12.2025 | 23:24
ՀՀ տարածքում ավտոճանապարհները հիմնականում անցանելի են
Ադրբեջանն աջակցում է ՌԴ-ի նախաձեռնությամբ Թուրքիայիում գազային հանգույցի ստեղծմանը
Քաղաքականություն
07.12.2022 | 22:06
Թուրքիայի էներգետիկայի և բնական պաշարների նախարար Ֆաթիհ Դյոնմեզը հայտարարել է, որ Ադրբեջանն ու մի շարք այլ երկրներ աջակցություն են հայտնել երկրում Ռուսաստանի առաջարկած գազային հանգույցի ստեղծման նախագծին, գրում է ՌԻԱ Նովոստին։
Թուրքիայի նախագահի մամուլի խոսնակ, գլխավոր խորհրդական Իբրահիմ Քալընն ավելի վաղ հայտարարել էր, որ իր երկիրը կարող է դառնալ ոչ միայն գազի տարանցման ուղի, այլև երկիր, որտեղ ձևավորվում է շուկան։
Թուրքիայի և ՌԴ-ի նախագահներ Ռեջեփ Թայիփ Էրդողանն ու Վլադիմիր Պուտինը ավելի վաղ հանձնարարել էին շտապ մշակել Թուրքիայում գազային հանգույցի ստեղծման նախագիծ, որով Ռուսաստանը կարող է գազի տարանցումը Հյուսիսային հոսքերից տեղափոխել դեպի Սևծովյան տարածաշրջան և Թուրքիա։ Էրդողանը նաև ասել էր, որ Եվրոպան կարող է ռուսական գազ ստանալ Թուրքիայի տարածքով։
«Ադրբեջանի նախագահ Ալիևն իր աջակցությունն է հայտնել նախագծին։ Շաբաթվա վերջին ադրբեջանական պատվիրակությունը կլինի Ստամբուլում իմ հյուրը, մենք կքննարկենք այդ նախագիծը»,- ասել է Դյոնմեզը 24TV-ի հետ զրույցում։
Հիշեցնենք, որ հոկտեմբերի 13-ին Աստանայում տեղի է ունեցել Թուրքիայի նախագահ Ռեջեփ Թայիփ Էրդողանի ու ՌԴ նախագահ Վլադիմիր Պուտինի հանդիպումը, որի ընթացքում ռուսական կողմն Անկարային առաջարկել էր գազային հանգույց ստեղծել Եվրոպա մատակարարումների համար։ Աստանայից վերադառնալիս էլ լրագրողների հետ զրույցում Էրդողանն ասել էր, որ Թուրքիայի Էներգետիկայի և բնական պաշարների նախարարությանը և ռուսական կողմից համապատասխան գերատեսչություններին հանձնարարվել է համատեղ քայլեր մշակել այդ ուղղությամբ։ Նա նաև նշել էր, որ Թրակիայի շրջանը կարող է դառնալ նոր գազային հանգույցի ստեղծման ամենահարմար վայրը։
Էմմա Չոբանյան
