29.04.2026 | 12:05
Հայաստանում շուտով կբացվի «Յուվենտուս»-ի ակադեմիան․ ղեկավարները ներկայացնում են ծրագիրը․ ՈՒՂԻՂ
ԱՆ-ն առաջարկում է դատախազներին ամեն ամիս 100 տոկոս հավելավճար տալ
Հասարակություն
26.11.2022 | 00:11
Արդարադատության նախարարությունը նոր նախագիծ է ներկայացնել՝ առաջարկելով դատախազների աշխատավարձերը կրկնապատկել: Ինչպես նշվում է այսօր «e-draft» իրավական ակտերի նախագծերի հրապարակման կայքում տեղադրված նախագծում՝ առաջարկվում է սահմանել դատախազին, «որպես առանձնակի ռիսկային, բարդություններով պայմանավորված և մասնագիտացում պահանջող պաշտոն զբաղեցնող անձի, պաշտոնային դրույքաչափի հարյուր տոկոսի չափով հավելում տրամադրելու հնարավորություն»:
Գերատեսչությունն այս պահին նման խոշոր ֆինանսական հատկացումը հիմնավորում է այն հանգամանքով, որ վերջին տարիներին քրեական գործերի քանակի աննախադեպ շարունակական աճի պայմաններում դատախազների անխուսափելի գերծանրաբեռնվածությունը կարող է հանգեցնել ՀՀ Սահմանադրությամբ ՀՀ դատախազությանը վերապահված գործառույթների իրականացման արդյունավետության նվազեցման, ինչը վերջնարդյունքում կարող է բերել հանցավորության դեմ արդյունավետ պայքարի և պետության քրեական քաղաքականության պատշաճ իրականացման հարցում առկա հանրային սպասելիքների չիրականացման.
«Ակնառու քանակական աճ է արձանագրվել դատախազական գործառույթների անխտիր բոլոր ուղղություններով, որպիսի պայմաններում դատախազների օրական աշխատաժամանակը շատ հաճախ հասնում է 12-13 ժամի: Նման գերծանրաբեռնված աշխատանքը, հանրային բարձր պատասխանատվությունը, դատախազների վրա առկա ճնշումները ինչպես զանգվածային լրատվության միջոցներով, այնպես էլ դատավարության մասնակիցների կողմից, այդ աշխատանքը դարձնում են պակաս գրավիչ և ռիսկային՝ հաշվի առնելով, որ նոր պաշտոնավարող դատախազի փաստացի աշխատավարձը չի գերազանցում 300․000 ՀՀ դրամը»,- նշվում է նախագծում:
Գլխավոր դատախազությունը, հաշվի առնելով վերոնշյալ դրույթները, մշակել է ««Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություն կատարելու մասին» օրենքի նախագիծը, որով նախատեսվում է դատախազներին վճարել ամսական հավելում՝ պաշտոնային դրույքաչափի 100 տոկոսի չափով:
Ուշադրության է արժանի այն հանգամանքը, որ ՀՀ դատախազությունում պաշտոն զբաղեցնող ընդհանուր 412 անձի ամսական դրույքաչափի 100 տոկոսի չափով հավելում նախատեսելու դեպքում, նախնական հաշվարկով, տարեկան կտրվածքով անհրաժեշտ է շուրջ 3.377.500.000 ՀՀ դրամ։
Այս համատեքստում հատկանշական է, որ ընդամենը երեկ Կառավարության նիստի ժամանակ հայտնի դարձավ, որ պետական պարտքը մինչև տարվա վերջ 10 միլիարդից անց կլինի:
Նախագիծը հանրային քննարկման համար բաց է մինչև դեկտեմբերի 11-ը: Այս պահին ունի 4 «կողմ» և 3 «դեմ» ձայն:
Ռոզա Վարդանյան
