Հասարակություն
07.11.2022 | 19:53
ՀՀ կրթության, գիտության, մշակույթի և սպորտի նախարարության աջակցությամբ մարզերի, Երևան քաղաքի և Արցախի Հանրապետության հանրակրթական դպրոցների 7-12-րդ դասարանների աշակերտների միջև «Սպարտակիադա» մարզական միջոցառման ծրագրով անցկացվել են շախմատի, բասկետբոլի և սեղանի թենիսի հանրապետական մրցումներ. տեղեկացնում են ՀՀ ԿԳՄՍՆ-ից։
Շախմատի մրցումներում հաղթող է ճանաչվել Շիրակի մարզի հավաքական թիմը, երկրորդ տեղը զբաղեցրել է Լոռու մարզի, իսկ երրորդ տեղը՝ Գեղարքունիքի մարզի թիմը։
Բասկետբոլի տղաների և աղջիկների հանրապետական եզրափակիչ 4-րդ փուլի մրցումներն ավարտվել են հոկտեմբերի 31-ին՝ Երևանի պետական համալսարանի մարզահամալիրում։ Միջմարզային և հանրապետական փուլին մասնակցել է 240 դպրոցական:
Տղաների պայքարում թիմային հաշվարկով առաջին հորիզոնականը զբաղեցրել է Շիրակի մարզի Արթիկի թիվ 3 ավագ դպրոցը, երկրորդ տեղը գրավել է Երևանի թիվ 87 միջնակարգ դպրոցը, իսկ լավագույն եռյակը եզրափակել է Լոռու մարզի Մեծավանի թիվ 1 միջնակարգ դպրոցը։
Աղջիկների պայքարում թիմային հաշվարկով առաջին հորիզոնականը զբաղեցրել է Երևանի թիվ 174 հիմնական դպրոցը, երկրորդ լավագույն արդյունքը ցույց է տվել Շիրակի մարզի Գյումրու «Տնտեսագիտական» վարժարանի թիմը, եռյակը եզրափակել է Լոռու մարզի Վանաձորի թիվ 4 հիմնական դպրոցը։
Սեղանի թենիսի տղաների և աղջիկների հանրապետական եզրափակիչ 4-րդ փուլի մրցումներն ավարտվել են նոյեմբերի 2-ին՝ «Դինամո» մարզադահլիճում:
Հանրապետական եզրափակիչ փուլի մրցումներին մասնակցել է ՀՀ 10 մարզերի և Երևան քաղաքի 7-9-րդ դասարանների 44 աշակերտ։
Թիմային պայքարում առաջին հորիզոնականը զբաղեցրել է Երևան քաղաքի հավաքական թիմը, երկրորդ տեղում Լոռու մարզի հավաքական թիմն է, երրորդ տեղը զբաղեցրել է Կոտայքի մարզի հավաքական թիմը:
Աղջիկների անհատական պայքարում հաղթող է ճանաչվել Արիաննա Գալստյանը՝ Երևանից, երկրորդ տեղը զբաղեցրել է Լուսինե Սահակյանը՝ Երևանից, եռյակը եզրափակել է Նիկա Գրիգորյանը՝ Լոռու մարզից։
Տղաների անհատական պայքարում հաղթող է ճանաչվել Գառնիկ Մանուկյանը՝ Երևանից, երկրորդ տեղում Ալեքս Առաքելյանն է՝ Լոռու մարզից, իսկ երկրորդ հորիզոնականը զբաղեցրել է Բորիս Բարսեղյանը՝ Կոտայքի մարզից։
1-ից 3-րդ տեղեր գրաված թիմերը և դպրոցները պարգևատրվել են ՀՀ կրթության, գիտության, մշակույթի և սպորտի նախարարության հավաստագրերով և գավաթներով:
