ՀՀ-ն այլևս չի ներկայացնում Արցախին․ կտրուկ բարձրանում է Ստեփանակերտի սուբյեկտայնությունը․ Արման Մելիքյան․ ՏԵՍԱՆՅՈՒԹ

Ինչո՞ւ Վլադիմիր Պուտինը Սոչիում չկարողացավ Իլհամ Ալիևին հարկադրել ընդունել երկու շատ կարևոր առաջարկներ՝ Լեռնային Ղարաբաղի կարգավիճակի հարցի որոշումը թողնել ապագային և երկարաձգել ռուս խաղաղապահների մնալու ժամկետը։ Սրանք, ի դեպ, ՌԴ-ի շահերից բխող առաջարկներ են որոնք պաշտպանում է ՀՀ-ն։

Արտակարգ և լիազոր դեսպան, Արցախի Հանրապետության նախկին արտգործնախարար Արման Մելիքյանը Factor TV-ին տված հարցազրույցում ասում է, որ սուր անհրաժեշտության առաջացման պարագայում Վլադիմիր Պուտինն Իլհամ Ալիևին համոզելու հետ կապված մեծ բարդությունների առաջ չի կանգնի։

«Բոլոր դեպքերում՝ այս միջանկյալ հանդիպումը, ես կարծում եմ, այնուամենայնիվ, հանգեցրել է հետնաբեմային որոշակի պայմանավորվածությունների, որոնց վերաբերյալ դրանց մասնակիցները չեն խոսելու և փորձելու են կյանքի կոչել։ Ամեն դեպքում, անհրաժեշտ է նրանից ելնել, որ իրավիճակը ոչ միայն հայ-ադրբեջանական հարաբերությունների ծիրում, այլ առհասարակ, մեր ռեգիոնում բարդանում է։ Իրանում է ներքին իրավիճակն ապակայունացել, և Իրանն իր դեմ մարտահրավերներ է տեսնում հայ-ադրբեջանական հարաբերությունների չկարգավորված լինելու հանգամանքից ելնելով, ինչպես նաև ռեգիոնում արդեն հայտնվել են եվրոպացի դիտորդներ, և կարող են հայտնվել նոր առաքելություններ՝ նկատի ունեմ ԵԱՀԿ-ի դիտորդներին։ Մեր ռեգիոնում իրավիճակը շարունակելու է ապակայունանալ՝ ի հաշիվ նոր գործոնների»,- ասաց դիվանագետը։

Արման Մելիքյանը կարծում է, որ Սոչիի հանդիպումը ՌԴ-ի, ՀՀ-ի, Ադրբեջանի ղեկավարների միջև, եթե բերել է փոխըմբռնումներ ինչ-ինչ հարցերի շուրջ, այնուամենայնիվ, կան հարցեր, որոնք այս եռանկյունուց դուրս են մնում, ինչը նշանակում է, որ կողմերից յուրաքանչյուրը շարունակելու է խաղալ իր խաղը։

Հարցազրույցն ամբողջությամբ՝ տեսանյութում։

Ռոբերտ Անանյան