07.08.2026 | 23:37
Անձրև, ամպրոպ և ջերմաստիճանի նվազում. առաջիկա օրերի եղանակի կանխատեսումը
Տեղի է ունեցել Արցախի բռնազավթված տարածքների մշակութային ժառանգության պաշտպանության խորհրդի նիստը
14.10.2022 | 20:46
Արցախի Հանրապետության պետական նախարար Արտակ Բեգլարյանի նախագահությամբ հոկտեմբերի 14-ին տեղի է ունեցել Արցախի Հանրապետության բռնազավթված տարածքների մշակութային ժառանգության պաշտպանության պետական խորհրդի հերթական նիստը: Այս մասին տեղեկանում ենք ԱՀ կառավարությունից։
«Կարճ ժամանակահատվածում Խորհուրդը կարողացել է արդյունավետորեն իրականացնել միջոցառումների պլանով հաստատված որոշ գործառույթներ: Արդեն ունենք բռնազավթված տարածքների մշակութային ժառանգության ու թանգարանային ցուցանմուշների որոշ ճշգրտված ցուցակներ, սակայն դեռևս նշված և այլ ուղղություններով մեծ աշխատանք կա անելու: Դրան զուգահեռ Ադրբեջանը շարունակում է վանդալիզմի քաղաքականությունը, որի դրսևորումները փաստագրելու և միջազգային հանրությանը պատշաճորեն ներկայացնելու ուղղությամբ ևս աշխատանքների արդյունավետության բարձրացման կարիք կա»,- իր խոսքում նշել է Արտակ Բեգլարյանը:
Կատարված աշխատանքների մասին զեկույցով հանդես են եկել Խորհրդի քարտուղար-համակարգող Սերգեյ Շահվերդյանը և Խորհրդի նախագահի տեղակալ Լեռնիկ Հովհաննիսյանը:
Տեղի ունեցած շահագրգիռ քննարկման արդյունքում հստակեցվել են Խորհրդի հետագա անելիքների ուղղությունները, որոնք վերաբերում էին փաստագրական, տեղեկատվական և այլ ուղղությունների: Որոշում է կայացվել առաջիկայում կազմակերպել շնորհանդես՝ կատարված աշխատանքները հանրության լայն շրջանակներին ներկայացնելու նպատակով:
