17.12.2025 | 15:44
Նպաստի նոր տեսակ՝ երեխա ունեցող ընտանիքների համար․ փոխնախարարը մանրամասնում է․ ՏԵՍԱՆՅՈՒԹ
Արտաքին գործերի նախարարությունից մեկնաբանում են 2 տասնյակ դեսպանների հնարավոր փոփոխության մասին տեղեկությունները
Քաղաքականություն
28.05.2018 | 19:10
Արտաքին գործերի նախարարության մամուլի խոսնակ Տիգրան Բալայանը ոչ հերքում, ոչ հաստատում է տարբեր երկրներում ավելի քան երկու տասնյակ ոչ դիվանագետ դեսպանների փոփոխության մասին Factor.am-ի տեղեկությունը:
««Դիվանագիտական ծառայության մասին» օրենքով և Սահմանադրությամբ հստակ ամրագրված է դեսպանների նշանակման կարգերը, որոնք նախատեսում են որոշակի արարողակարգային գործողություններ և դրանց արդյունքում վերջում հրապարակվում է նախագահի հրամանագիր: Մինչ նախագահի հրամանագրի հրապարակումը ընդունված չէ խոսել փոփոխություններից, դրանց հավանականությունից կամ բացառումից»,- Factor.am-ի հետ զրույցում պարզաբանեց Տիգրան Բալայանը՝ նկատելով, որ եթե անգամ նման տեղեկություն ունենան, պետք է սպասեն՝ նախագահի հրամանագիր լինի, այնուհետև խոսեն այդ մասին:
«Մենք չենք կարող հարցի վերաբերյալ որևիցե մեկնաբանություն տալ: Ինչ վերաբերում է հնարավոր փոփոխություններին, ապա որպես վարչապետի թեկնածու՝ պարոն Փաշինյանն Ազգային ժոողովում այդ թեմային անդրադարձել է: Դեսպանների փոփոխություններն Արտաքին գործերի նախարարությունում մշտական բնույթ են կրում»,- շարունակեց ԱԳՆ խոսնակը:
Մեր դիտարկմանը՝ այս դեպքում խոսքը ավելի քան երկու տասնյակ դեսպանների մասինն է, Բալայանն արձագանքեց. «Ես չգիտեմ՝ այդ թիվը որտեղից է ձեզ հայտնի, բայց անգամ մեկ փոփոխության դեպքում պետք է սպասել նախագահի հրամանագրի հրապարակմանը»:
Հիշեցնենք՝ ավելի վաղ Factor.am-ը «Դիվանագիտության արդյունավետության բաձրացման հրամայականն ու բիզնեսմեն դեսպանները» տեսանյութում անդրադարձել էր ոչ դիվանագետ դեսպաններին և նրանց գործունեությանը:
Շողիկ Գալստյան
