10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
«Իրանը տարածաշրջանի սահմանները փոխելու մասին մտածողների երազանքը պատմական մղձավանջի է վերածելու»․ Իրանի խորհրդարանի Ազգային անվտանգության հանձնաժողովի նախագահ
Քաղաքականություն
20.09.2022 | 09:47
Իրանի Իսլամական խորհրդի Ազգային անվտանգության և արտաքին քաղաքականության հանձնաժողովի նախագահ Վահիդ Ջալալզադեն ասել է «Իրանը տարածաշրջանի սահմանները փոխելու մասին մտածողների երազանքը պատմական մղձավանջի է վերածելու». գրում է Թեհրանի «Արաքս նյուզ» լրատվականը։
«Ջալալզադեն պետական հեռուստատեսության հարցերին պատասխանելով նշել է. «Շատ հստակ հայտարարում եմ, մենք մեր լուրջ մտահոգությունն ենք հայտնում վերջին երկու շաբաթվա ընթացքում Հայաստանի և Ադրբեջանի տարածքում տեղի ունեցած իրադարձությունների վերաբերյալ»:
«Մենք այս մասին խոսել եւ մի քանի հանդիպումներ ենք ունեցել երկրի բարձրագույն ղեկավարության հետ։ Երկշաբաթյա արձակուրդից հետո Խորհրդարանը չորեքշաբթի օրը՝ (սեպտեմբերի 21-ին), կարևոր և արտահերթ նիստ կանցկացնի այս հարցով, և մենք պահանջում ենք, որ երկրի դիվանագիտական կազմը և Ազգային անվտանգության բարձրագույն խորհրդը այս հարցով զբաղվի»,- հավելել է Ջալալզադեն:
Իրանի Արևմտյան Ատրպատական նահանգի պատգամավոր Ջալալզադեն զգուշացրել է. «Ես զգում եմ, որ երկրում այս հարցի մասին լուռ իրավիճակ է տիրում, մինչդեռ դա կարող է ազդել Իսլամական Հանրապետության շահերի վրա՝ տարբեր տեսանկյուններից և ուղղություններից»:
Նա հայտարարել է. «Վերջին մեկ-երկու տարվա ընթացքում մեր հանձնաժողովը տարբեր խմբեր է ուղարկել Ադրբեջան և Հայաստան և բացատրել է տարածաշրջանի ռազմավարական իրողությունների մասին: Անկեղծ կարող եմ ասել, որ դավադրության հոտ ենք առնում՝ իրադարձություններից, այցելություններից, տարբեր, հատկապես արտատարածաշրջանային պաշտոնյաների հայտարարություններից»:
Ջալալզադեն հատկապես ընդգծել է․ «Ուստի երկրի պատասխանատուները պետք է շատ լուրջ դիրքորոշում ընդունեն, և ինչպես (Իրանի) Հեղափոխության գերագույն առաջնորդն է հստակեցրել, մեր կարմիր գիծը՝ տարածաշրջանի սահմանների փոփոխությունն է, ուստի երկրում ո՛չ ոք հավելյալ ապացույցի կարիք չունի եւ ապացույցը բոլորի՛ն պարզ է»:
Նա եզրակացրել է․ «Մենք նախկին Խորհրդային Հանրապետությունների անկախության առաջին իսկ օրերից եղել ենք այդ ժողովրդների կողքին: Իրանի Իսլամական Հանրապետության կողմից Ադրբեջանի, Հայաստանի, Թուրքմենստանի և այլ հանրապետությունների ժողովուրդներին ցուցաբերված օգնությունը անհնար է մոռանալ»:
Հիշեցնենք, Իրանի պաշտոնյաներն ավելի վաղ նույնպես զգուշացրել են տարածաշրջանի սահմանների փոփոխության թուրք-ադրբեջանական սպառնալիքների մասին:
