03.10.2026 | 22:08
Հայաստանի հավաքականը ժամանել է Պոդգորիցա
Բացահայտվել են Ալիևի բռնապետական ռեժիմի պատերազմական հանցագործությունները․ արդյո՞ք պատիժ կլինի․ ՏԵՍԱՆՅՈՒԹ
Քաղաքականություն
16.09.2022 | 21:02
Ադրբեջանը սեպտեմբերի 12-ի լույս 13-ի գիշերը ռազմական ագրեսիայի ենթարկեց Հայաստանի Հանրապետության միջազգայնորեն ճանաչված պետական սահմանը՝ Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից ինտենսիվ կրակ բացելով հայկական դիրքերի ուղղությամբ։ Ադրբեջանը նպատակադրված խոշոր տրամաչափի զինատեսակներից թիրախավորել է խաղաղ հայ բնակչությանը, քաղաքացիական օբյեկտներ, շենքեր կամ շինություններ։
Իլհամ Ալիևի՝ նախապես պլանավորված ռազմական ագրեսիայի հետևանքով առնվազն մեկ խաղաղ բնակիչ է զոհվել, չորսը՝ վիրավորվել։
Զինծառայողների շրջանում կորուստներն ավելի շատ են․ Նիկոլ Փաշինյանն այսօր հայտնել է 135 զինծառայողի զոհվելու մասին, առնվազն 77 զոհի մասին էլ հայտնել է պաշտոնական Բաքուն։ Արդեն հայտնվել են ապացույցներ Ադրբեջանի բանակի զինծառայողների նկարահանած տեսանյութերի տեսքով, թե ինչպես են խոշտանգել զոհված զինծառայողների մարմինները։
Ալիևի՝ պատերազմական հանցագործի գործելաոճը նոր չէ և բազմաթիվ են ապացույցներն Արցախյան երկրորդ պատերազմի ժամանակ պատերազմական հանցագործությունների վերաբերյալ։ Հայաստանի քաղաքացիական հասարակության կազմակերպությունները հավաքագրել են Ադրբեջանի կողմից 44-օրյա պատերազմի ժամանակ մարդու իրավունքների խախտումների վերաբերյալ ապացույցներ, փաստեր, որ Ադրբեջանը ռասիստական և հայատյաց քաղաքականություն է վարում։
Այս չափազանց կարևոր զեկույցի հեղինակները և պատրաստողներն այսօր Factor TV-ի տաղավարում են։ Հրավիրված քննարկմանը մասնակցում են Բաց հասարակության հիմնադրամներ-Հայաստանի փոխտնօրեն Դավիթ Ամիրյանը, «Իրավունքների պաշտպանություն առանց սահմանների» հասարակական կազմակերպության ներկայացուցիչ Աննա Մելիքյանը, Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, Իրավունքի պաշտպանության և զարգացման հիմնադրամի իրավաբան Սերգեյ Գրիգորյանը։
