10.10.2026 | 12:57
Նավթի գներն աճել են
Կոչ ենք անում զերծ մնալ հասարակության ուշադրությունը շեղող, ինքնապաշտպանության բնազդը բթացնող տեղեկատվությունից․ ՀԺՄ
Հասարակություն
16.09.2022 | 15:15
Հայաստանի ժուռնալիստների միությունը հայտարարություն է տարածել, որում ասվում է
«2022 թվականի սեպտեմբերի 12-ի լույս 13-ի գիշերը Հայաստանի Հանրապետության` միջազգայնորեն ճանաչված ինքնիշխան տարածքն Ադրբեջանի կողմից ենթարկվել է ռազմական ագրեսիայի։ Հայաստանի Հանրապետությունը փաստացի գտնվում է պատերազմական իրավիճակում. Զինված ուժերը պետության տարածքային ամբողջականությունն ու սահմանների անձեռնմխելիությունը պաշտպանելու համար պայքար են մղում պարտադրված պատերազմում։
Այս իրավիճակում Կառավարության անդամները, նաև ԱԺ մեծամասնության որոշ պատգամավորներ պարբերաբար խոսում են տեղեկատվական անվտանգության, ԶԼՄ-ների գործունեության` իրավիճակին համապատասխան աշխատանք ծավալելու մասին, սակայն այդ ուղղությամբ որևէ հստակ քայլ չի կատարվել, թերևս, բացառությամբ Տիկ-տոկ սոցիալական ցանցի մասնակի արգելափակումից։
Նկատի ունենալով, որ մեկ առանձին սոցցանցի մասնակի արգելափակումը չի կարող էական նշանակություն ունենալ ապատեղեկատվության, անհարկի, կեղծ օրակարգեր շրջանառող լրատվական հոսքերի կանխման և իրավիճակից բխող խնդիրների մասին կարևոր տեղեկատվության տարածման վրա, կոչ ենք անում ԶԼՄ-ներին` զերծ մնալ ստեղծված իրավիճակին ոչ համարժեք, անկարևոր իրադարձությունների, սոցցանցերում հայտնի առանձին անձանց (այդ թվում՝ բլոգերների) գործունեության, անձնական կյանքի վերաբերյալ պատմությունների լուսաբանումից, ինչպես նաև` երկրում ստեղծված ռազմական սպառնալիքի` փաստացի պատերազմի հետ առնչություն չունեցող, հասարակությանը կարևոր տեղեկատվությունից շեղող որևէ գործընթացի լուսաբանումից։
Ստեղծված իրավիճակի հետ աղերս չունեցող տեղեկատվությունն արդյունքում շեղելու է ուշադրությունն ամենակարևորից` բթացնելով հասարակության ինքնապաշտպանության բնազդը:
ԶԼՄ-ների մեր բոլոր գործընկերներին կոչ ենք անում գործել փաստացի պատերազմական իրավիճակներին հատուկ կանոնների խստագույն պահպանմամբ, տարածել բացառապես հավաստի, բազմակի ստուգված տեղեկատվություն՝ առաջնորդվելով որևէ պարագայում զինված ուժերի մարտունակությանը չվնասելու սկզբունքով և առաքելությամբ։ Այս պայմաններում մեզ պետք է առաջ մղի ոչ թե մեր մասնագիտական, այլ բանակի, զինված ուժերի հաջողությունն ու դրան նպաստելու գործելակերպը։
ԶԼՄ ներկայացուցիչներին հորդորում ենք նաև օգտագործել իրենց օտարերկրյա գործընկերների հետ մասնագիտական և անձնական կապերը՝ Ադրբեջանի սանձազերծած ագրեսիայի վերաբերյալ հավաստի ու համակողմանի տեղեկատվությունն արտաքին լսարանին հասցնելու և միջազգային հանրությանը մեր երկրի նկատմամբ կատարվողին հաղորդակից դարձնելու նպատակով»։
