Պապիկյանի հետ քննարկել ենք` զինված ուժերի գործունեության խաթարման փորձերը կոշտ մեթոդներով պետք է կանխվեն․ ՏԵՍԱՆՅՈՒԹ

«Պաշտպանության նախարարի հետ քննարկել ենք` զինված ուժերի գործունեության խաթարման փորձերը կոշտ մեթոդներով պետք է կանխվեն»,- Կառավարության նիստի ընթացքում հայտարարեց վարչապետ Նիկոլ Փաշինյանը։

«Հայաստանի զինված ուժերի գործունեությունը խաթարելու ցանկացած փորձ պետք է ամենակոշտ մեթոդներով կանխվի, անկախ մոտիվացիաներից, գործող անձանց էմոցիոնալ վիճակից:

44-օրյա պատերազմի ընթացքում ու դրանից հետո, ցավոք, դեպքեր ենք ունեցել, այդ գործերով, լավ է, որ ինտենսիվ քննություն է գնում, և դատական գործեր կան: Որևէ անձի որևէ կարգավիճակ թույլ չի տալիս օրենքից դուրս գործողություններ անել: Անկախ էմոցիոնալ վիճակից, եթե մեկն օրենքի գիծն անցնում է, պետք է իրավապահ համակարգի շատ կոնկրետ, արագ և կոշտ ձևերով զգա: Սա պետական անվտանգության հարց է: Այստեղ չենք պատրաստվում որևէ կոմպրոմիսի գնալ»,- ասաց վարչապետը:

Նա խիստ կարևորեց նաև տեղեկատվական անվտանգության ապահովումը: «Տեսնում ենք, որ ինչ-որ կասկածելի անձինք կարող են կասկածելի տեղեկություններով սպառնալիքներ ստեղծել երկրի ազգային անվտանգության նկատմամբ… Դա, ըստ էության, գործակալական ցանց է ՀՀ-ում:

ԱԱԾ-ն վերջին շրջանում շատ մեծ հաջողություններ ունի գործակալական ցանցեր բացահայտելու առումով, բայց, կարծում եմ, որ մենք գործակալական ցանցերի հետ մեր խնդիրները դեռևս չենք կարգավորել, պետք է այդ ուղղությամբ շարունակենք հետևողական աշխատանք իրականացնել»,- նշեց Փաշինյանը:

Մանրամասները՝ տեսանյութում։