«Ալրաղացի Լյովիկ» մականունով հայտնի Լևոն Սարգսյանի գործով վերաքննիչ բողոք է ներկայացվել

ԱԺ նախկին պատգամավոր, «Ալրաղացի Լյովիկ» մականունով հայտնի Լևոն Սարգսյանի գործով օրեր առաջ վերաքննիչ բողոք է ներկայացվել։ Պաշտպանական կողմը  միջնորդել է ամբողջությամբ բեկանել և փոխել Երևան քաղաքի ընդհանուր իրավասության դատարանի դատավճիռը և  գործն ուղարկել համապատասխան դատարան՝ նոր քննության, կամ դատավճիռը՝  Լևոն Սարգսյանի նկատմամբ նշանակել ավելի մեղմ պատիժ:

Հիշեցնենք՝ հունիսի 30-ին դատավոր Տաթևիկ Գրիգորյանը Լևոն Սարգսյանին  դատապարտել էր 9 տարվա ազատազրկման՝ մեղավոր ճանաչելով Մաքսային կոմիտեի նախկին պետ Արմեն Ավետիսյանի առանձնատան վրա 14 տարի առաջ կատարված ավազակային հարձակումը պատվիրելու և կազմակերպելու համար:

Factor.am-ի հետ զրույցում Սարգսյանի պաշտպան Դավիթ Հունանյանը նշեց, որ բողոքարկման հիմքերը բավականին շատ են եղել: Մասնավորապես, ըստ պաշտպանի՝ Լևոն Սարգսյանի մեղադրանքը ձևակերպված է եղել թերի, իսկ քրեական պատասխանատվությունը՝ անհատականացված չէ.

«Անհասկանալի է՝ ինչ ապացույցով է հաստատված բնակելի տան վրա ավազակային հարձակման արարքը, սույն քրեական գործով արված բոլոր քննչական, դատավարական գործողություններն ապօրինի են ի սկզբանե: Դատարանն ապացուցված է համարել Լևոն Սարգսյանի մեղքը՝ հիմնվելով դատապարտյալների ցուցմունքի վրա այն պայմաններում, երբ այդ դատապարտյալները դատական նիստում խոստովանել են, որ ստել են, երբ տվել են ցուցմունք Լևոն Սարգսյանի դեմ: Բացի այդ, գործը քննած դատավոր Տաթևիկ Գրիգորյանը պետք է հայտներ ինքնաբացարկ, քանի որ ուներ կանխակալ վերաբերմունք այս գործի նկատմամբ»,- մանրամասնեց Հունանյանը:

Վերաքննիչ բողոքը դատարան է ստացվել սեպտեմբերի 2-ին և մակագրվել դատավորներ Արսեն Նիկողոսյանին,  Վազգեն Ռշտունուն և Արշակ Վարդանյանին։

Նշենք, որ Սարգսյանից բացի ամբաստանյալի աթոռին է նաև նրա փեսան՝ Սուրեն Ղազարյանը, որը դատապարտվել է 8 տարվա ազատազրկման: Այս պահին վերջինս ստորագրությամբ ազատ է արձակվել, իսկ Սարգսյանը կալանավորված է մինչ դատավճռի օրինական ուժի մեջ մտնելը: Հավելենք՝ մեղադրական ճառի ժամանակ դատախազը պահանջել էր Լևոն Սարգսյանին դատապարտել 11, իսկ Սուրեն Ղազարյանին՝ 9 տարի ժամկետով ազատազրկման, պաշտպանական կողմը միջնորդել էր արդարացման դատավճիռ կայացնել:

Ռոզա Վարդանյան