Դալար համայնքի ուսուցիչներն ու աշակերտները պահանջում են ՀՀԿ-ական տնօրենի հրաժարականը՝ նրան մեղադրելով կաշառակերության համար

Արարատի մարզի Դալար համայնքի միջնակարգ դպրոցի անձնակազմն այսօր դասադուլ է հայտարարել՝ պահանջելով Հանրապետական տնօրեն Շողիկ Հախվերդյանի հրաժարականը։ Դասադուլի կազմակերպիչներից Արմեն Ամիրզադյանը Factor.am-ի հետ զրույցում ասաց, որ մշտապես բողոքներ է լսել թե՛ աշակերտներից, թե՛ ուսուցիչներից:

«Ասում էին՝ էլ չենք կարող այսպես և այլն: Բոլոր ուսուցիչները բացի մի 2-3 հոգուց, որոնք տնօրենի համախոհներն են, հայտարարեցին, որ դեմ են տնօրենին: Նրան չեն ընդունում նաև աշակերտներն ու համայնքի ղեկավարը»,- ասաց Արմեն Ամիրզադյանը՝ պնդելով, որ «ժողովուրդը զզվել է ՀՀԿ-ական տնօրենից և այլևս նրան չի ուզում տեսնել այդ պաշտոնում»:

Չնայած դպրոցի անձնակազմի պահանջին՝ տնօրեն Շողիկ Հախվերդյանը հայտարարել է՝ չի պատրաստվում հրաժարական տալ: «Ինքը հիմա տնօրենի ժամանակավոր պաշտոնակատար է, մենք թույլ չենք տա, որ շարունակի, եթե մինչև հունիսի 13-ը արհամարհված կմնա տնօրենի պաշտոնում, դա իր գործն է: Դրանից հետո, սակայն, իրավունք չունի շարունակելու»,- հավելեց ակցիայի կազմակերպիչներից Արմեն Ամիրզադյանը՝ նկատելով, որ եթե տնօրենը շարունակի աշխատել, ապա աշակերտները կհրաժարվեն քննություններից և ավարտական վկայականներից:

Մեր զրուցակիցը նաև հայտարարեց՝ ՀՀԿ-ական Շողիկ Հախվերդյանը ընտրությունների ժամանակ այդ կուսակցության համար ձայներ է հավաքագրել. «Կաշառք է տվել, կաշառք բաժանել: Սերժ Սարգսյանի վարչապետության դեմ պայքարի ժամանակ էլ ճնշել է ուսուցիչներին, երեխաներին, որ չմասնակցեն համաժողովրդական շարժմանը»:

Տեսանյութը՝ Նար Շախյանի ֆեյսբուքյան էջի