27.07.2026 | 23:18
Ոստիկանները ձերբակալել են ապօրինի զենք պահող տղամարդուն
Հացահատիկով բեռնված ևս երկու նավ է դուրս եկել Ուկրաինայի նավահանգիստներից
Քաղաքականություն
12.08.2022 | 18:27
Ուկրաինական Չեռնոմորսկ և Պիվդեննի նավահանգիստներից «հացահատիկային միջանցքի» շրջանակում ևս երկու նավ է դուրս եկել հացահատիկի բեռով։ Այս մասին Twitter-ում հայտնել է Թուրքիայի Ազգային պաշտպանության նախարարությունը, գրում է Korrespondent-ը։
Մասնավորապես, Բելիզի դրոշի ներքո նավարկող Sormovsky նավը Չեռնոմորսկից Թուրքիայի Թեքիրդաղ քաղաք է տեղափոխում 3,5 հազար տոննա ցորեն, իսկ Մարշալյան կղզիների դրոշով Star Laura նավը՝ 60 հազար տոննա եգիպտացորենով Պիվդենից մեկնել է Իրան։
Հիշեցնենք, որ հուլիսի 22-ին Ստամբուլում համաձայնագիր է ստորագրվել Ուկրաինայից «հացահատիկային միջանցքի» գործարկման մասին։ Այն սկսվել է օգոստոսի 1-ին։ Օգոստոսի 3-ին Ստամբուլում ստուգվել է Լիբանանի համար առաջին հացահատիկի նավը:
Ընդհանուր առմամբ, «հացահատիկային միջանցքի» շրջանակում ուկրաինական նավահանգիստներից արդեն 14 նավ է դուրս եկել։ Նրանք մեկնում են աշխարհի յոթ երկրներ։ Նավերում 370 հազար տոննա գյուղմթերք կա։
Տաթև Ֆռանգյան
